ഇന്ത്യാ-റഷ്യാ കരാര്‍ ഒപ്പുവച്ചു

ദില്ലി : ഇന്ത്യയും റഷ്യയും തന്ത്രപ്രധാന കരാര്‍ ഒപ്പുവച്ചു. ഇരു രാജ്യങ്ങളും തമ്മില്‍ വിവിധ മേഖലകളില്‍ സഹകരണം ശക്തമാക്കുന്നതിനുള്ളകരാര്‍ ഒക്ടോബര്‍ മൂന്ന് ചൊവാഴ്ചയാണ് ഒപ്പു വച്ചത്.

ശാസ്ത്ര സാങ്കേതിക രംഗത്തും കാര്‍ഷിക വ്യാപാരരംഗത്തും കരാറനുസരിച്ച് ഇരുരാജ്യങ്ങളും സഹകരണം ശക്തമാക്കും. എന്നാല്‍ പ്രതിരോധ സഹകരണത്തെക്കുറിച്ച് കരാറില്‍ ഒന്നും പറയുന്നില്ല.

റഷ്യന്‍ പ്രതിരോധ വിദഗ്ധരുമായി ചര്‍ച്ചയിലാണെന്നും പുടിന്‍ മടങ്ങുന്നതിനു മുമ്പ് പ്രതിരോധ കരാറില്‍ ഒപ്പുവയ്ക്കുമെന്നും പ്രധാനമന്ത്രിയുടെ സുരക്ഷാ ഉപദേഷ്ടാവ് ബ്രജേഷ് മിശ്ര വെളിപ്പെടുത്തി. വിമാനവാഹിനി കപ്പലും സുഖോയ് വിമാനങ്ങളും റഷ്യന്‍ ടാങ്കുകളും വാങ്ങുന്നത് സംബന്ധിച്ച് ചര്‍ച്ച നടക്കുന്നുണ്ടെന്നും മിശ്ര വെളിപ്പെടുത്തി.

കശ്മീര്‍ പ്രശ്നത്തെക്കുറിച്ച് ചര്‍ച്ച നടന്നിട്ടില്ലെന്ന് മിശ്ര വ്യക്തമാക്കി. എന്നാല്‍ ദക്ഷിണേഷ്യയിലെ സംഘര്‍ഷം ലഘൂകരിക്കാന്‍ ഇന്ത്യയും പാകിസ്ഥാനും ചര്‍ച്ചയിലൂടെ ശ്രമം നടത്തുമെന്ന് പുടിന്‍ പ്രത്യാശിച്ചു. ഐക്യരാഷ്ട്രസഭാ രക്ഷാസമിതിയില്‍ ഇന്ത്യക്ക് സ്ഥിരാംഗത്വം നല്‍കുന്നതിനെ റഷ്യ അനുകൂലിക്കുമെന്ന് പുടിന്‍ ഉറപ്പ് നല്‍കി.