ഛോട്ടാരാജനെ പിടികൂടാന്‍ മുംബൈ പൊലീസ്

മുംബൈ: അധോലോക തലവന്‍ ഛോട്ടാ രാജനെ അറസ്റ് ചെയ്യാന്‍ ബാങ്കോക്കിലേക്ക് പൊലീസ് സംഘത്തെ അയക്കാനായി കേന്ദ്രസര്‍ക്കാരിന്റെ അനുമതിക്ക് കാത്തിരിക്കുകയാണ് മുംബൈ പൊലീസ്.

ബുധനാഴ്ച തന്നെ കേന്ദ്രസര്‍ക്കാരിന്റെ അനുമതി ലഭിക്കുമെന്നാണ് മുംബൈ പൊലീസ് പ്രതീക്ഷിക്കുന്നത്. അനുമതി കിട്ടിക്കഴിഞ്ഞാല്‍ ബാങ്കോക്കിലേക്ക് പോയി രാജനെ അറസ്റ് ചെയ്ത് മുംബൈയിലേക്ക് കൊണ്ടുവരാനാവും.

ചൊവാഴ്ച ബാങ്കോക്ക് കോടതി പാസ്പോര്‍ട്ട് കേസില്‍ രാജനെ കുറ്റവിമുക്തനാക്കിയിരുന്നു. ഇന്ത്യയുടെ അപേക്ഷ പ്രകാരം ഇന്റര്‍പോള്‍ മുന്നറിയിപ്പ് നല്‍കിയതിനാല്‍ ബാങ്കോക്ക് പൊലീസ് 36 മണിക്കൂര്‍ നേരത്തേക്ക് രാജനെ കസ്റഡിയില്‍ വെക്കും. അതിനു ശേഷം രാജന് എവിടെ വേണമെങ്കിലും പോകാവുന്നതാണ്.

തിങ്കളാഴ്ച തന്നെ ബാങ്കോക്കിലേക്ക് പൊലീസ് സംഘത്തെ അയക്കാന്‍ മുംബൈ പോലീസ് തീരുമാനിച്ചിരുന്നതാണ്. എന്നാല്‍ തായി സര്‍ക്കാരുമായുള്ള ചില ഔപചാരികക്രമങ്ങള്‍ തീര്‍ക്കേണ്ടതുണ്ടെന്ന് കേന്ദ്രസര്‍ക്കാര്‍ അറിയിച്ചതുമൂലം പൊലീസ് സംഘത്തെ അയക്കുന്നത് മാറ്റിവെക്കുകയായിരുന്നു.

അസിസ്റന്റ് കമ്മിഷണര്‍ ഷങ്കര്‍ കാംബ്ലെ, ഇന്‍സ്പെക്ടര്‍ സുധാകര്‍ പൂജാരി, സബ് ഇന്‍സ്പെക്ടര്‍ ഹേമന്ത് ദേശായി എന്നിവരാണ് ബാങ്കോക്കിലേക്ക് പോകുന്ന സംഘത്തിലുളളത്.

എതിരാളികളുടെ ആക്രമണത്തില്‍ പരിക്കേറ്റ രാജന്‍ ഇപ്പോഴും ആശുപത്രിയില്‍ ചികിത്സയിലാണ്. അക്രമികളെന്നു സംശയിക്കുന്നവരെ തിരിച്ചറിയാനായി രാജനെ സ്ട്രെച്ചറിലാണ് കഴിഞ്ഞ ആഴ്ച കോടതിയില്‍ കൊണ്ടുവന്നത്. അക്രമികളെ തനിക്ക് തിരിച്ചറിയാനാവുന്നില്ലെന്നാണ് രാജന്‍ കോടതിയില്‍ മൊഴി കൊടുത്തത്.