ഛോട്ടാരാജന്: ഇന്ത്യയുടെ തീരുമാനത്തിന് കാക്കും
ബാങ്കോക്ക്: അധോലോകരാജാവ് ഛോട്ടാരാജനെ ഏറ്റെടുക്കാനുള്ള നീക്കങ്ങള് ഒക്ടോബര് അഞ്ച് വ്യാഴാഴ്ച രാവിലെ ഒമ്പതു മണിക്കകം നടത്തണമെന്ന് തായ് പൊലീസ് ഇന്ത്യയ്ക്ക് അന്ത്യശാസനം നല്കി. രാജനെ കസ്റ്റഡിയില് സൂക്ഷിക്കുന്നതിന് തങ്ങള്ക്കുള്ള സമയപരിധി വ്യാഴാഴ്ച രാവിലെ തീരുമെന്നതിനാലാണിതെന്ന് തായ് പൊലീസ് അധികൃതര് ഒക്ടോബര് നാല് ബുധനാഴ്ച വ്യക്തമാക്കി.
ഛോട്ടാരാജന് ഇന്ത്യയില് നിരവധി കേസുകളില് പ്രതിയാണെന്നതിനാല് ഇന്ത്യയ്ക്കു വിട്ടു നല്കണമെന്ന് മുംബൈ പൊലീസ് ഇന്റര്പോള് മുഖേന തായ് പൊലീസിനോടഭ്യര്ത്ഥിച്ചിരുന്നു. എന്നാല് ഇക്കാര്യത്തില് കേന്ദ്ര സര്ക്കാരിന്റെ ഔദ്യോഗിക അഭ്യര്ത്ഥന തായ് സര്ക്കാരിന് ലഭിച്ചിട്ടില്ല.അതിനാല് രാജനെ മുംബൈ പൊലീസിനു കൈമാറുന്നതിനുള്ള നടപടികളൊന്നുമായിട്ടില്ല.
ഇതിനിടയില് കഴിഞ്ഞ ദിവസം ബാങ്കോക്ക് ജില്ലാകോടതി രാജനെ കുറ്റവിമുക്തനാക്കിയിരുന്നു. അതിനാല് കുറ്റവാളിയല്ലാത്ത ഇയാളെ ഇനി കസ്റ്റഡിയില് വയ്ക്കാനാവില്ലെന്ന നിലപാടിലാണ് തായ് പൊലീസ്. തായ് ഇമ്മിഗ്രേഷന് അധികൃതര്ക്ക് മുന്നില് വ്യാജരേഖകള് സമര്പ്പിച്ചുവെന്ന കേസില് 540 രൂപ മാത്രം പിഴയീടാക്കിയാണ് രാജനെ കോടതി കുറ്റവിമുക്തനാക്കിയത്. തായ്ലണ്ട് വിട്ടു പോകാനും കോടതി രാജന് അനുവാദം നല്കിയിട്ടുണ്ട്.
തന്റെ ജീവന് ഇപ്പോഴും ഭീഷണിയിലാണെന്നതിനാല് ബാങ്കോക്ക് വിട്ടു പോകാന് അനുവദിക്കണമെന്ന് രാജന് കോടതിയോടഭ്യര്ത്ഥിച്ചിരുന്നു. ഒരു മൂന്നാം രാജ്യത്തേയ്ക്കു പോകാന് അനുവദിക്കണമെന്നായിരുന്നു രാജന്റെ അഭ്യര്ത്ഥന. തായ് നിയമപ്രകാരം കുറ്റവിമുക്തനാക്കപ്പെട്ട ഇയാളെ ഇനിയും തടഞ്ഞുവയ്ക്കാന് പൊലീസിനധികാരമില്ലെന്ന് രാജന്റെ അഭിഭാഷകനും വാദിക്കുന്നു.
എന്നാല് ഇന്റര്പോള് വഴിയുള്ള മുംബൈപൊലീസിന്റെ അഭ്യര്ത്ഥന പ്രകാരമാണ് തായ് പൊലീസ് രാജനെ ഇപ്പോഴും തടഞ്ഞു വച്ചിരിക്കുന്നത്. പക്ഷേ ഇക്കാര്യത്തില് ഇന്ത്യന് സര്ക്കാരിന്റെ ഭാഗത്തു നിന്നുണ്ടാവേണ്ട നീക്കങ്ങള് ഇനിയും വേണ്ടവിധത്തില് നടക്കാത്തതാണ് തായ് പൊലീസിനെ വിഷമിപ്പിക്കുന്നത്. ഏന്തായാലും ഒക്ടോബര് അഞ്ച് വ്യാഴാഴ്ച രാവിലെ ഒമ്പതു മണി വരെ ഇന്ത്യയ്ക്കു സമയം നല്കിയിരിക്കുകയാണ് തായ് പൊലീസ്.