ഛോട്ടാരാജനെ ഇന്ത്യയിലെത്തിക്കാന്‍ ശ്രമം തുടരുന്നു

ദില്ലി: തായ്ലണ്ട് തലസ്ഥാനമായ ബാങ്കോക്കില്‍ പൊലീസ് കസ്റ്റഡിയില്‍ കഴിയുന്ന അധോലോക നായകന്‍ ഛോട്ടാരാജനെ ഇന്ത്യയിലെത്തിക്കുന്നതിനുള്ള മുംബൈ പൊലീസിന്റെ ശ്രമം തുടരുന്നു. രാജനെ കൈമാറ്റം ചെയ്യുന്നതിനായി തായ്ലണ്ട് സര്‍ക്കാരിനു സമര്‍പ്പിക്കേണ്ട രേഖകള്‍ മുംബൈ പൊലീസ് ടീം തായ്ലണ്ടില്‍ നിന്നയച്ചത് കേന്ദ്രസര്‍ക്കാരിന്റെ വിവിധ വകുപ്പുകള്‍ പരിശോധിച്ചു വരികയാണ്.

രേഖകള്‍ പരിശോധിച്ചു വരുന്നതായും കൂടുതല്‍ രേഖകള്‍ ഹാജരാക്കാന്‍ മുംബൈ പൊലീസിനോടാവശ്യപ്പെട്ടതായും കേന്ദ്ര വിദേശകാര്യമന്ത്രാലയവക്താവ് അറിയിച്ചു. ഒക്ടോബര്‍ ഒമ്പതിന് മുംബൈ പൊലീസ് അധികൃതര്‍ അയച്ചു കൊടുത്ത രേഖകള്‍ ആണിവ. ഇവയുടെ നിയമപരവും മറ്റുമായ വശങ്ങള്‍ ബന്ധപ്പെട്ടവര്‍ പഠിച്ചു വരികയാണെന്ന് വിദേശകാര്യമന്ത്രാലയ വക്്താവ് അറിയിച്ചു. കൂടുതല്‍ രേഖകള്‍ എത്തുന്നത് കാത്തിരിക്കുകയാണ് വിദേശകാര്യമന്ത്രാലയം.

ഇന്ത്യന്‍ വിദേശകാര്യമന്ത്രാലയത്തിന്റെ ഔദ്യോഗിക അഭ്യര്‍ത്ഥനയുണ്ടായാലേ തായ്ലണ്ട് അധികൃതര്‍ക്ക് ഛോട്ടാരാജനെ ഇന്ത്യയിലേക്കയക്കാനാകൂ. ഇതിനായാണ് മുംബൈ പൊലീസ് രേഖകള്‍ സമര്‍പ്പിച്ചു കാത്തിരിക്കുന്നത്. മുംബൈ പൊലീസ് ജോയിന്റ് കമ്മീഷണര്‍ ഡി.ശ്രീനിവാസ് ഇക്കാര്യവുമായി ബന്ധപ്പെട്ട് ദില്ലിയില്‍ നീക്കങ്ങള്‍ നടത്തുന്നുണ്ട്.