സ്നേഹം കൊണ്ട് ലോകത്തെ കീഴടക്കാന്...
കൊച്ചി: സ്നേഹം കൊണ്ട് ലോകത്തെ കീഴടക്കുകയാണ് താന് രൂപം നല്കിയ ലോകസേവാപ്രസ്ഥാനത്തിന്റെ ലക്ഷ്യമെന്ന് കമല സുരയ്യ. ഒക്ടോബര് 15 ഞായറാഴ്ച കൊച്ചിയില് ലോകസേവാട്രസ്റ്റിന്റെ പ്രഥമ സമ്മേളനത്തില് ആമുഖപ്രസംഗം നടത്തുകയായിരുന്നു അവര്.
ആദ്യം ലോകസേവ രാഷ്ട്രീയപ്പാര്ട്ടിയാണെന്നു പ്രഖ്യപിച്ചതിനെത്തുടര്ന്ന് നിരവധി രാഷ്ട്രീയക്കാര് തന്നെ സമീപിച്ചതായി സുരയ്യ വെളിപ്പെടുത്തി. തങ്ങളുടെ പാര്ട്ടിയില് ലോകസേവയെ ലയിപ്പിക്കണമെന്നതായിരുന്നു എല്ലാവരുടേയും ലക്ഷ്യം. എം പി യും എം എല് എ യുമൊക്കെ ആക്കാമെന്ന് പറഞ്ഞ് നിരവധി പേര് സമീപിച്ചു. നല്ല കാലത്ത് ഇത്തരം വാഗ്ദാനങ്ങളുണ്ടായിരുന്നു. അപ്പോള് പോലും താന് വഴങ്ങിയിട്ടില്ല- സുരയ്യ പറഞ്ഞു.
സ്നേഹത്തിന്റെ സന്ദേശവുമായി ലോകസേവ ലോകം മുഴുവനും വ്യാപിക്കും. സംഘടന ലോകത്തില് പൂക്കളുമായും മൊട്ടുകളായും നിറയും. സാമ്പത്തിക -അധികാര ലക്ഷ്യങ്ങളില്ലാതെ പ്രവര്ത്തിക്കുന്നവരെയാണ് ലോകസേവയ്ക്കാവശ്യം- സുരയ്യ വെളിപ്പെടുത്തി.
റിട്ട. ജില്ലാ ജഡ്ജി ഫാത്തിമാ റഹ്മാന് സമ്മേളനത്തില് അധ്യക്ഷയായിരുന്നു. ഐ എന് എല് അഖിലേന്ത്യാ പ്രസിഡന്റ് ഇബ്രാഹിം സുലൈമാന് സേഠ്, ഡോ. ബഞ്ചമിന് പുളിമൂട്, ഡോ.ഹെന്റി ഓസ്റ്റിന്, പ്രഫ.ബഹാവുദ്ദീന്, ജസ്റ്റീസ് പി കെ ഷംസുദ്ദീന്, പ്രഫ. എം കെ സാനു, രത്നകല എസ് മേനോന്, ഗുരു ഏബ്രഹാം, ഡോ. ഖദീജ തുടങ്ങിയവര് പ്രസംഗിച്ചു.