കശ്മീരില് നാലു തീവ്രവാദികള് കൊല്ലപ്പെട്ടു
ജമ്മു: കഴിഞ്ഞ 24 മണിക്കൂറിനകം രണ്ടു വിദേശികളുള്പ്പടെ നാലു തീവ്രവാദികള് കശ്മീരില് കൊല്ലപ്പെട്ടു. കൊല്ലപ്പെട്ട തീവ്രവാദികളില് നിന്ന കനത്ത ആയുധശേഖരവും പിടിച്ചെടുത്തിട്ടുണ്ട്.
ജമ്മുവിലെ ദെറല് ധോക്, ബഛര് ലന്വല് എന്നിവിടങ്ങളിലാണ് തീവ്രവാദികള് കൊല്ലപ്പെട്ടത്. തീവ്രവാദികളുടെ ഒളിത്താവളത്തില് സുരക്ഷാസൈനികര് നടത്തിയ തിരച്ചിലിനെ തുടര്ന്നുണ്ടായ ഏറ്റുമുട്ടലിലാണ് ഇവര് കൊല്ലപ്പെട്ടത്.
പൂഞ്ച് ജില്ലയില് സൈന്യം നടത്തിയ തിരച്ചിലിലാണ് ആയുധശേഖരം പിടിച്ചെടുത്തത്. പത്തു കിലോ ആര്ഡിഎക്സ്, ഒരു എകെ 56 റൈഫിള്, 20 റൈഫിള് ഗ്രനേഡുകള്, അഞ്ച് ആര്പിജി റോക്കറ്റ്, ആറ് ആര്പിജി ബൂസ്റര്, പത്ത് വിദൂര നിയന്ത്രണ ഉപകരണങ്ങള്, 20 ഇലക്ട്രോണിക് ഡിറ്റൊണേറ്റര്, പത്ത് ഡിറ്റൊണേറ്റര് തുടങ്ങിയവയാണ് ഇവിടെ പിടിച്ചെടുത്തത്.
ദോദ- ഭദേര്വാഹ് റോഡിലെ സ്നാഹി ഭല്ലയിലുണ്ടായ കുഴി ബോംബ് സ്ഫോടനത്തില് ഒരു സുരക്ഷാഭടന് പരിക്കേറ്റു. രജൗരി ജില്ലയിലെ നൗഷേര മേഖലയില് ഒക്ടോബര് 16 തിങ്കളാഴ്ച പാക് സൈന്യം നടത്തിയ ഷെല്ലാക്രമണത്തില് ഒരാള്ക്കു പരിക്കേറ്റു. കന്നുകാലികള് കൊല്ലപ്പെടുകയും ചെയ്തിട്ടുണ്ട്. ഇന്ത്യന് സേന ഉടനെ തന്നെ തിരിച്ചു വെടിവെച്ചു.
രജൗരിയിലെ നിയന്ത്രണരേഖയ്ക്കു സമീപമുള്ള സുന്ദര്ബനിയില് 21 റൈഫിള് ഗ്രനേഡ്, രണ്ട് ഐഇഡി ബാറ്ററി, ഒമ്പത് വിസ്ഫോടക ഉപകരണങ്ങള് എന്നിവയുള്പ്പടെ ആയുധങ്ങളുടെ വലിയ ശേഖരം പിടിച്ചെടുത്തു.