ടൈറ്റാനിയം: മലിനീകരണ നിയന്ത്രണത്തിന് 100 കോടി
തിരുവനന്തപുരം : ട്രാവന്കൂര് ടൈറ്റാനിയത്തിലെ മലിനീകരണ നിയന്ത്രണത്തിന് 100 കോടി രൂപയുടെ പദ്ധതി തയ്യാറായതായി വ്യവസായമന്ത്രി സുശീലാഗോപാലന്.
പദ്ധതി ഒന്നരവര്ഷം കൊണ്ട് പൂര്ത്തിയാകുമെന്ന് ഒക്ടോബര് 26 വ്യാഴാഴ്ച വാര്ത്താസമ്മേളനത്തില് മന്ത്രി അറിയിച്ചു. ഫാക്ടറി ഉയര്ത്തുന്ന മലിനീകരണ പ്രശ്നങ്ങള്ക്കെതിരെ സ്ഥലവാസികള് പ്രക്ഷോഭം നടത്താനിരിക്കെയാണ് മന്ത്രിയുടെ പ്രഖ്യാപനം.
മലിനജലത്തില് നിന്നും ആസിഡ് വേര്തിരിച്ച് വീണ്ടും ജലം ഉപയോഗിക്കുന്ന പദ്ധതിക്കാണ് രൂപം നല്കിയിരിക്കുന്നത്. ഇതിനായി മൂന്ന് പ്ലാന്റുകള് സ്ഥാപിക്കും.
മലിനീകരണം മൂലം രോഗം ബാധിച്ചവര്ക്കുള്ള ചികിത്സയ്ക്കായി 30 ലക്ഷം രൂപ ചെലവില് കമ്പനി ആശുപത്രി സ്ഥാപിക്കും.പരിസരവാസികള്ക്കുള്ള ക്ഷേമപദ്ധതിക്കായി രണ്ട് കോടി രൂപ ജില്ലാ ഭാരവാഹികളെ മന്ത്രി ഏല്പ്പിച്ചു. ഇവിടെ താമസിക്കുന്നവര്ക്ക് ടൈറ്റാനിയത്തില് 25 ശതമാനം ജോലി സംവരണം ഇപ്പോള് തന്നെ നടപ്പാക്കുന്നുണ്ടെന്ന് മന്ത്രി പറഞ്ഞു.