പരുമല പള്ളി കൂദാശ ഇന്ന്

പത്തനംതിട്ട : പുതുക്കി പണിത പരുമല പള്ളിയുടെ കൂദാശ ആയിരക്കണക്കിന് ഭക്തജനങ്ങളുടെ സാന്നിദ്ധ്യത്തില്‍ ഒക്ടോബര്‍ 27 വെള്ളിയാഴ്ച തുടങ്ങും.

ഓര്‍ത്തഡോക്സ് സഭയുടെ പരമാധ്യക്ഷന്‍ മാര്‍ ബസേലിയോസ് മാര്‍ത്തോമ്മ മാത്യുസ് ദ്വിതീയന്‍ കാതോലിക്കാ ബാവ കൂദാശ കര്‍മ്മത്തിന് നേതൃത്വം നല്‍കും. മലങ്കര സഭയിലെ എല്ലാ മെത്രാപ്പോലീത്തമാരും കൂദാശ ചടങ്ങുകളില്‍ പങ്കെടുക്കും. ഒക്ടോബര്‍ 27 വെള്ളിയാഴ്ച വൈകുന്നേരം തുടങ്ങുന്ന ചടങ്ങുകള്‍ ഒക്ടോബര്‍ 28 ശനിയാഴ്ച ഉച്ചവരെ നീളും.

കൂദാശയ്ക്ക് മുന്നോടിയായുള്ള ദീപശിഖാ പ്രയാണം ഒക്ടോബര്‍ 26 വ്യാഴാഴ്ച മുളന്തുരുത്തി വെട്ടിക്കല്‍ ദയാറയില്‍ നിന്നും തുടങ്ങി. മാര്‍ത്തോമ മാത്യുസ് ദ്വിതീയനാണ് ദീപശിഖ ആശിര്‍വദിച്ചത്. ഭക്തിനിര്‍ഭരമായ അന്തരീക്ഷത്തില്‍ അലങ്കരിച്ച രഥത്തില്‍ ദീപശീഖ പരുമല തിരുമേനിയുടെ ജന്മഗൃഹമായ മുളന്തുരുത്തി ചാത്തുരുത്തില്‍ തറവാട്ടിലെത്തി. ഇപ്പോഴത്തെ കുടുംബകാരണവര്‍ ജിമ്മി ചാത്തുരുത്തി ദീപശിഖ സ്വീകരിച്ചു. ഒക്ടോബര്‍ 27 വെള്ളിയാഴ്ച ദീപശിഖാ പ്രയാണം പരുമലയിലെത്തിച്ചേരും.

ഒക്ടോബര്‍ 28 ശനിയാഴ്ച വൈകുന്നേരം പരുമലയില്‍ ചേരുന്ന പൊതുയോഗത്തില്‍ മഹാരാഷ്ട്ര ഗവര്‍ണര്‍ അദ്ധ്യക്ഷപ്രസംഗം നടത്തും. മാര്‍ത്തോമാ മെത്രാപ്പോലീത്ത ഡോ.ഫിലിപ്പോസ് മാര്‍ ക്രിസോസെം, ആര്‍ച്ച് ബിഷപ്പ് മാര്‍ ജോസഫ് പൗവത്തില്‍, എന്‍എസ്എസ് ജനറല്‍ സെക്രട്ടറി പി.കെ.നാരായണപണിക്കര്‍, പാളയം ഇമാം പി.കെ. ഹംസ മൗലവി ഫറൂഖി, സിഎസ്ഐ ബിഷപ്പ് ഡോ.സാം മാത്യു, എസ്എന്‍ഡിപി ആക്ടിംഗ് പ്രസിഡന്റ് സി.കെ.വിദ്യാസാഗര്‍ എന്നിവരും പൊതുയോഗത്തെ അഭിസംബോധന ചെയ്യും.