മലബാറിലും ഇനി പവര്‍ ഗ്ലൈഡര്‍

കോഴിക്കോട്:മലബാറില്‍ പവര്‍ഗ്ലൈഡര്‍ വിമാനം എത്തുന്നു. മലബാറിലെ വിനോദ സഞ്ചാര വികസനം ലക്ഷ്യം വച്ചാണ് പവര്‍ ഗ്ലൈഡര്‍ എന്നറിയപ്പെടുന്ന മൈക്രോലൈറ്റ്സ് വിമാനം എത്തുന്നത്.

പൈലറ്റടക്കം രണ്ടു പേര്‍ക്കു പറക്കാവുന്നതാണ് മൈക്രോലൈറ്റ്സ് വിമാനം. വിദേശങ്ങളില്‍ ഉല്ലാസ യാത്രയ്ക്ക് ധാരാളമായി ഉപയോഗിക്കുന്ന ഇത്തരം വിമാനം ഇന്ത്യയില്‍ ആദ്യമായാണ് എത്തുന്നതെന്ന് ബന്ധപ്പെട്ടവര്‍ പറയുന്നു.

മ ലബാര്‍ എയ്റോസ്പോര്‍ട്സ് സൊസൈറ്റിയുടെയും കണ്ണൂര്‍ ജില്ലാ ടൂറിസം വികസന സമിതിയുടെയും ആഭിമുഖ്യത്തിലാണ് പവര്‍ ഗ്ലൈഡര്‍ കൊണ്ടുവരുന്നത്. ജര്‍മന്‍ നിര്‍മിത വിമാനം നവംബര്‍ രണ്ട് വ്യാഴാഴ്ച കരിപ്പൂര്‍ വിമാനത്താവളത്തില്‍ ഇറക്കും.

ഇപ്പോള്‍ 14 ദിവസത്തേയ്ക്ക് പരീക്ഷണാര്‍ത്ഥമാണ് കൊണ്ടുവരുന്നത്. വിജയിക്കുന്ന പക്ഷം കോഴിക്കോട്ടും കണ്ണൂരും വിമാനം പറത്താന്‍ പരിശീലന പദ്ധതി ആരംഭിക്കുമെന്ന് എയ്റോ സ്പോര്‍ട്സ് സൊസൈറ്റി ജനറല്‍ സെക്രട്ടറി സഫര്‍ അഹമ്മദ് അറിയിച്ചു.