എസ്എന്‍ഡിപി അബ്കാരികളുടെ പിടിയില്‍ :അഴിക്കോട്

തൃശ്ശൂര്‍ : എസ്എന്‍ഡിപി യോഗം മദ്യമാഫിയയുടെ പിടിയിലായതിനാലാണ് മദ്യദുരന്തത്തെക്കുറിച്ച് അത് മൗനം പാലിക്കുന്നതെന്ന് പ്രൊഫ.സുകുമാര്‍ അഴിക്കോട്.

മദ്യമാഫിയ എസ്എന്‍ഡിപി യോഗത്തിന് മേല്‍ പിടിമുറുക്കിയ കാര്യം തനിക്ക് നേരത്തെ അറിയാമായിരുന്നെന്നും എന്നാല്‍ ഇത് മുഖ്യമന്ത്രി ഗൗരവമായി എടുത്തില്ലെന്നും നവംബര്‍ രണ്ട് വ്യാഴാഴ്ച പുറത്തിറക്കിയ ഒരു പ്രസ്താവനയില്‍ അഴിക്കോട് പറഞ്ഞു. അതിനാലാണ് താന്‍ ശിവഗിരി ഉപദേശക സമിതിയില്‍ നിന്നും രാജി വച്ചതെന്നും അഴിക്കോട് പറയുന്നു.

അബ്കാരി കേസുകളില്‍ അറസ്റ് ചെയ്യപ്പെട്ടിട്ടുള്ളവരാണ് പല എസ്എന്‍ഡിപി നേതാക്കളും. ഇപ്പോള്‍ ഒളിവിലുള്ളഅബ്കാരി മണിച്ചന് എസ്എന്‍ഡിപിയില്‍ സുപ്രധാന സ്ഥാനങ്ങള്‍ നല്‍കിയത് വെള്ളാപ്പള്ളിയും ശാശ്വതികാനന്ദയും ചേര്‍ന്നാണെന്ന് അഴിക്കോട് ആരോപിച്ചു.

ശാര്‍ക്കര ക്ഷേത്രത്തിലെ ആനക്കൊട്ടില്‍ ഉത്സവത്തിന് ലക്ഷങ്ങള്‍ സംഭാവന നല്‍കിയ ഇവര്‍ മൂന്നുപേരുടെയും ചിത്രങ്ങളുള്ള പരസ്യവും പുറത്തിറങ്ങിയിരുന്നു. മദ്യമാഫിയയുമായുള്ള ബന്ധത്താല്‍ ശ്രീനാരായണഗുരുവിന് തന്നെ അപമാനമായിക്കഴിഞ്ഞ എസ്എന്‍ഡിപിയെ മദ്യലോബിയില്‍ നിന്നും മോചിപ്പിക്കാന്‍ കേരളീയര്‍ ഒന്നിക്കണമെന്നും അഴിക്കോട് പ്രസ്താവനയില്‍ ആഹ്വാനം ചെയ്യുന്നു.