തിരുവനന്തപുരത്ത് 4,400 ലിറ്റര്‍ സ്പിരിറ്റ് പിടിച്ചു

തിരുവനന്തപുരം: ജില്ലയില്‍ കഴിഞ്ഞ രണ്ടുദിവസങ്ങളിലായി നടന്ന വ്യാപകമായ റെയ്ഡില്‍ 4,400 ലിറ്റര്‍ അനധികൃത സ്പിരിറ്റും 500 ലിറ്റര്‍ ചാരായവും പിടിച്ചെടുത്തു. നവംബര്‍ ആറ് തിങ്കളാഴ്ച അസിസ്റ്റന്റ് എക്സൈസ് കമ്മീഷണര്‍ സി.കെ.ശശീന്ദ്രന്‍ വെളിപ്പെടുത്തിയതാണിത്.

കേരളാ- തമിഴ്നാട് അതിര്‍ത്തിയിലെ കോലിയക്കോട് ഒരു കിണറ്റില്‍ നിന്നുമാണ് 154 ബാരലുകളില്‍ നിറച്ച 4,400 ലിറ്റര്‍ സ്പിരിറ്റ് കണ്ടെത്തിയത്.

നെയ്യാറ്റിന്‍കര താലൂക്കില്‍ നടത്തിയ റെയ്ഡില്‍ 400 ലിറ്റര്‍ ചാരായവും 4,000 ലിറ്റര്‍ വാഷും പിടിച്ചെടുത്തു. സംഭവവുമായി ബന്ധപ്പെട്ട് രണ്ട് പേരെ അറസ്റ്റ് ചെയ്തു. നെടുമങ്ങാട് സര്‍ക്കിളില്‍ നിന്ന് 75 ലിറ്റര്‍ ചാരായവും 2,500 ലിറ്റര്‍ വാഷും പിടിച്ചെടുത്തു.

വനംവകുപ്പോദ്യോഗസ്ഥരുടെ സഹായത്തോടെ റെയ്ഡ് ശക്തമാക്കാന്‍ ജില്ലാകളക്ടര്‍ എസ്.ശ്രീനിവാസന്‍ എക്സൈസ് ഉദ്യോഗസ്ഥര്‍ക്ക് നിര്‍ദ്ദേശം നല്‍കിയിട്ടുണ്ട്. തമിഴ്നാട്ടില്‍ നിന്നും കാട്ടിലൂടെ കേരളത്തിലേക്ക് അനധികൃത സ്പിരിറ്റ് വന്‍തോതില്‍ കടത്തുന്നതായി വിവരം കിട്ടിയതിനെത്തുടര്‍ന്നാണിത്.