മാണി ഗ്രൂപ്പ്- ബിജെപി ബന്ധം പരസ്യമാകുന്നു

കോട്ടയം: കേരള കോണ്‍ഗ്രസ്- മാണി ഗ്രൂപ്പും ബിജെപിയും തമ്മിലുള്ള ധാരണ പരസ്യമാകുന്നു. കോട്ടയം ജില്ലയില്‍ മൂന്നിടത്ത് പഞ്ചായത്ത് തിരഞ്ഞെടുപ്പിന്റെ രണ്ടാം ഘട്ടത്തില്‍ ബിജെപി മാണി ഗ്രൂപ്പിന് പരസ്യമായി പിന്തുണ പ്രഖ്യാപിച്ചു.

തിരഞ്ഞെടുപ്പ് നടക്കുന്ന ആറ് ജില്ലാ പഞ്ചായത്ത് ഡിവിഷനുകളില്‍ നാലിടത്ത് ബിജെപി സ്ഥാനാര്‍ത്ഥികള്‍ മത്സരിക്കുന്നു. കങ്ങഴയിലും പള്ളിക്കത്തോട്ടത്തിലും മാണി ഗ്രൂപ്പിന് ബിജെപി പിന്തുണ പ്രഖ്യാപിച്ചിരിക്കുകയാണ്. പാമ്പാടി ഗ്രാമപഞ്ചായത്ത് അഞ്ചാം വാര്‍ഡിലും മാണി ഗ്രൂപ്പിന് ബിജെപി പിന്തുണയുണ്ട്.

പരസ്പര ധാരണയുടെ വിശദാംശങ്ങള്‍ ഇരു പാര്‍ട്ടികളും വെളിപ്പെടുത്തിയിട്ടില്ല. യുഡിഎഫ് ഘടകകക്ഷിയായി നില്ക്കുമ്പോള്‍ മുന്നണി വിട്ടുള്ള ബന്ധം തുറന്നു സമ്മതിക്കാന്‍ മാണി ഗ്രൂപ്പിനു കഴിയില്ലെന്നതു മനസ്സിലാക്കിയാണ് ബിജെപിയുടെ പ്രവര്‍ത്തനം.

കേരളാ കോണ്‍ഗ്രസ്- എം ചെയര്‍മാന്‍ സി.എഫ്.തോമസിന്റെ നേതൃത്വത്തിലുള്ള വിഭാഗം ഈ ധാരണയ്ക്കെതിരാണെങ്കിലും ഇവരുടെ അഭിപ്രായത്തിന് പാര്‍ട്ടിയില്‍ ഭൂരിപക്ഷ പിന്തുണയില്ലെന്ന് ചൂണ്ടിക്കാണിക്കപ്പെടുന്നു.

മാണി ഗ്രൂപ്പിന്റെ ബിജെപി ബന്ധം യുഡിഎഫില്‍ ഭിന്നതയ്ക്കു കാരണമായിട്ടുണ്ട്. ഈ ബന്ധം പേരെടുത്തു പറയാതെ വിമര്‍ശിച്ച് ടി.എം.ജേക്കബ് ഉഴവൂര്‍ ഡിവിഷനില്‍ പര്യടനം നടത്തി. ഇവിടെ ജേക്കബ് ഗ്രൂപ്പും സ്ഥാനാര്‍ത്ഥിയെ നിര്‍ത്തിയിട്ടുണ്ട്.