കേരളത്തിലെ കയര്വ്യവസായം പ്രതിസന്ധിയില്
കൊച്ചി: കേരളത്തിലെ കയര് വ്യവസായം നിലനില്പിനായി പൊരുതുകയാണെന്ന് ഇന്ത്യന് കയര് അസോസിയേഷന് ചെയര്മാന് മാത്യു ജോസഫ് പറഞ്ഞു. അസോസിയേഷന്റെ വാര്ഷിക പൊതുയോഗത്തില് സംസാരിക്കുകയായിരുന്നു അദ്ദേഹം.
മൂന്നു ദശാബ്ദങ്ങള്ക്കു മുമ്പ് വിദേശവിപണിയില് നിന്ന് നേരിട്ടിരുന്ന മത്സരം ഇപ്പോള് അയല്സംസ്ഥാനങ്ങളില് നിന്ന് നേരിടേണ്ട സ്ഥിതിയാണ്. കടുത്ത മത്സരത്തില് കേരളത്തിലെ കയര് വ്യവസായം പിന്തള്ളപ്പെടുകയാണ്. കയര് ഉല്പാദനത്തിന് ആധുനിക സാങ്കേതിക വിദ്യ പ്രദാനം ചെയ്യാന് കയര് ബോര്ഡിന് ഉത്തരവാദിത്തമുണ്ടെന്ന് മാത്യു ജോസഫ് പറഞ്ഞു. കയര് ബോര്ഡ് ഗവേഷണ വിഭാഗത്തിന്റെ പ്രവര്ത്തനം ഏകോപിപ്പിക്കണമെന്ന് അദ്ദേഹം നിര്ദ്ദേശിച്ചു.
ലാഭകരമായ കയര് സഹകരണസംഘങ്ങള്ക്കു മാത്രമേ സര്ക്കാര് ധനസഹായം നല്കാവൂ എന്നാണ് അസോസിയേഷന് നിലപാടെന്ന് മാത്യു ജോസഫ് പറഞ്ഞു. ലാഭകരമായ സഹകരണസംഘങ്ങളെ കണ്ടെത്താന് സര്ക്കാര് നിയോഗിച്ച വിദഗ്ദ്ധ സമിതിയുടെ റിപ്പോര്ട്ടിന്മേല് ഇതുവരെ തീരുമാനമൊന്നും ഉണ്ടായിട്ടില്ല.
കേരളത്തിലെ കയര്മേഖലയില് കൂലി കൂടുതലാണെന്ന് മാത്യു ജോസഫ് പറഞ്ഞു. ഉല്പാദനച്ചെലവിന്റെ 60 ശതമാനത്തോളം കൂലിയാണെന്ന് അദ്ദേഹം ചൂണ്ടിക്കാട്ടി.