ജനകീയാസൂത്രണം: മദ്യവിരുദ്ധപ്രവര്‍ത്തനവും വേണം

കണ്ണൂര്‍ : ജനകീയാസൂത്രണ പരിപാടിയില്‍ മദ്യവിരുദ്ധപ്രവര്‍ത്തനവും ഉള്‍പ്പെടുത്തണമെന്ന് പ്രതിപക്ഷനേതാവ് എ.കെ.ആന്റണി.

ശക്തരായ മദ്യലോബിക്കെതിരായ പോരാട്ടം രാഷ്ട്രീയ കക്ഷികള്‍ക്ക് മാത്രമായി നടത്താനാവില്ലെന്ന് നവംബര്‍ ഏഴ് ചൊവാഴ്ച വാര്‍ത്താലേഖകരോട് സംസാരിക്കവെ ആന്റണി പറഞ്ഞു.

ഗാന്ധിയന്‍ സംഘടനകളെയും വനിതാ സംഘടനകളെയും മദ്യവിരുദ്ധപ്രവര്‍ത്തനത്തില്‍ സര്‍ക്കാര്‍ ഉള്‍പ്പെടുത്തണം. ഗ്രാമസഭകളും അയല്‍ക്കൂട്ടങ്ങളും അതാത് പ്രദേശത്തെ മദ്യവിരുദ്ധപ്രവര്‍ത്തനങ്ങള്‍ നടത്തണം. അടുത്ത ജനകീയാസൂത്രണപദ്ധതിയില്‍ വിഷമദ്യത്തിനെതിരായ പോരാട്ടം പ്രധാന വിഷയമായിരിക്കണമെന്നും ആന്റണി നിര്‍ദേശിച്ചു.

മദ്യലോബിയില്‍ നിന്നും മാസപ്പടി പറ്റിയ ഉദ്യോഗസ്ഥരെ കേസില്‍ നിന്നും രക്ഷിക്കാനുള്ള നീക്കത്തിന് പിന്നില്‍ രാഷ്ട്രീയക്കാരും ഉദ്യോഗസ്ഥരും മദ്യമാഫിയയും തമ്മിലുള്ള ബന്ധം വെളിവാകുമെന്ന സര്‍ക്കാരിന്റെ ഭയമാണുള്ളതെന്ന് ആന്റണി ചൂണ്ടിക്കാട്ടി.

കണ്ണൂര്‍ ജില്ലയില്‍ തിരഞ്ഞെടുപ്പ് അക്രമമുണ്ടായ പ്രദേശങ്ങള്‍ ആന്റണി സന്ദര്‍ശിച്ചു. രാഷ്ട്രീയ അക്രമത്തില്‍ നാശനഷ്ടമുണ്ടായവര്‍ക്ക് സര്‍ക്കാര്‍ നഷ്ടപരിഹാരം നല്‍കണമെന്ന് ആന്റണി ആവശ്യപ്പെട്ടു.