മന്ത്രിയുടെ പരിപാടികള് ബഹിഷ്കരിക്കും: യുഡിഎഫ്
തിരുവനന്തപുരം : വിഷമദ്യദുരന്തത്തിന്റെ ധാര്മ്മിക ഉത്തരവാദിത്വം ഏറ്റെടുത്ത് എക്സൈസ് മന്ത്രി ടി.ശിവദാസമേനോന് രാജി വയ്ക്കാത്തതിനാല് യുഡിഎഫ് മന്ത്രിയുടെ പരിപാടികള് ബഹിഷ്കരിക്കുന്നു.
നവംബര് എട്ട് ബുധനാഴ്ച ചേര്ന്ന യുഡിഎഫ് യോഗത്തിന് ശേഷം യുഡിഎഫ് കണ്വീനര് കെ.ശങ്കരനാരായണന് വാര്ത്താലേഖകരെ അറിയിച്ചതാണ് ഇക്കാര്യം. മന്ത്രി രാജിവയ്ക്കും വരെ യുഡിഎഫ് പ്രവര്ത്തകരും എംഎല്എമാരും എംപിമാരും മന്ത്രിയുടെ പരിപാടികള് ബഹിഷ്കരിക്കുമെന്ന് ശങ്കരനാരായണന് പറഞ്ഞു.
മന്ത്രിയെ നീക്കം ചെയ്യാനാവശ്യപ്പെട്ട് വേണമെങ്കില് നവംബര് 17ന് രാജ്ഭവന് മാര്ച്ച് നടത്തി ഗവര്ണര്ക്ക് നിവേദനം നല്കാനും ആലോചിക്കുന്നുണ്ടെന്ന് ശങ്കരനാരായണന് അറിയിച്ചു.
കേരളത്തിലെ കാര്ഷികോല്പ്പന്നങ്ങളുടെ വിലയിടിവ് തടയണമെന്നാവശ്യപ്പെട്ട് പ്രധാനമന്ത്രിക്കും കേന്ദ്ര ധനകാര്യമന്ത്രിക്കും നിവേദനം സമര്പ്പിക്കുമെന്നും ശങ്കരനാരായണന് അറിയിച്ചു.