പാലക്കാട്ട് വീണ്ടും കോ-ലീ-ബീ വീതംവയ്പ്

പാലക്കാട്: പാലക്കാട് നഗരസഭയില്‍ വീണ്ടും കോ-ലീ- ബീ വീതംവയ്പ്. നഗരസഭാ വൈസ്ചെയര്‍മാന്‍ തിരഞ്ഞെടുപ്പില്‍ മറനീക്കി പുറത്തുവന്ന കോണ്‍ഗ്രസ്- മുസ്ലീംലീഗ്- ബി ജെ പി അവിശുദ്ധബന്ധം സ്റ്റാന്‍ഡിംങ്് കമ്മിറ്റി രൂപവത്കരണത്തിലൂടെ അരക്കിട്ടുറപ്പിച്ചിരിക്കുകയാണ് പാലക്കാട്ട്.

കോണ്‍ഗ്രസും ലീഗും ബി ജെ പി യും ബി ജെ പിയിലെ വിമതഗ്രൂപ്പും ചേര്‍ന്ന് സ്റ്റാന്‍ഡിംങ്് കമ്മിറ്റി സ്ഥാനങ്ങള്‍ വീതം വച്ചെടുത്തു. തിരഞ്ഞെടുപ്പില്‍ ഗൂഡാലോചനയുണ്ടെന്നാരോപിച്ച് സി പി എം വാക്കൗട്ട് നടത്തി.

നാലു സ്റ്റാന്‍ഡിംങ്് കമ്മിറ്റികളിലെ ചെയര്‍മാന്‍ സ്ഥാനം കോണ്‍ഗ്രസ്, ലീഗ്, ബി ജെ പി , ബി ജെ പി വിമതവിഭാഗം എന്നിവര്‍ വീതിക്കാനാണ് തീരുമാനമെന്നറിയുന്നു. ചെയര്‍മാന്‍ തിരഞ്ഞെടുപ്പ് കഴിഞ്ഞിട്ടില്ല.

എന്നാല്‍ നവംബര്‍ എട്ട് ബുധനാഴ്ച സ്റ്റാന്‍ഡിംങ് കമ്മിറ്റി അംഗങ്ങളുടെ തിരഞ്ഞെടുപ്പില്‍ ഈ നാലു കക്ഷികള്‍ സ്ഥാനങ്ങള്‍ വീത ം വയ്ക്കുകയായിരുന്നു.

കോണ്‍ഗ്രസ്, ലീഗ്, ബി ജെ പി , ബി ജെ പി വിമത കക്ഷി നേതാക്കള്‍ എന്നിവര്‍ നവംബര്‍ ഏഴ് ചൊവാഴ്ച രാത്രി നടത്തിയ ഗൂഡാലോചനയിലാണ് വിചിത്ര സഖ്യവും വീതംവയ്പും രൂപം കൊണ്ടതെന്ന് സി പി എം ആരോപിച്ചു.