വിമാനത്തില്‍ സെല്‍ഫോണ്‍ : വിലക്ക് കര്‍ശനമായി പാലിക്കണമെന്ന് കോടതി

ദില്ലി: പറക്കുന്നതിനു തൊട്ടു മുമ്പും നിലത്തിറങ്ങിക്കഴിഞ്ഞാലുടനെയും റണ്‍വേയിലൂടെ ഓടിക്കൊണ്ടിരിക്കുന്ന വിമാനത്തില്‍ സെല്‍ഫോണ്‍ ഉപയോഗിക്കരുതെന്ന നിരോധനം കര്‍ശനമായി പാലിക്കാന്‍ ദില്ലി ഹൈക്കോടതി സര്‍ക്കാരിനു നിര്‍ദ്ദേശം നല്‍കി.

വിമാനത്തിലെ കണ്‍ട്രോള്‍ പാനലിന്റെ വൈദ്യുത, വാര്‍ത്താവിനിമയ സംവിധാനങ്ങള്‍ക്കു സെല്‍ഫോണില്‍ നിന്നുള്ള റേഡിയോതരംഗങ്ങള്‍ പ്രശ്നങ്ങളുണ്ടാക്കുമെന്നതിനാലാണ് വിലക്കേര്‍പ്പെടുത്തിയിരിക്കുന്നത്.

വിമാനം ചലിച്ചു കൊണ്ടിരിക്കുമ്പോള്‍ അതിനുള്ളില്‍ സെല്‍ഫോണ്‍ പ്രവര്‍ത്തിപ്പിക്കുന്നില്ലെന്ന് അധികൃതര്‍ ഉറപ്പുവരുത്തണമെന്നും നിരോധനം ലംഘിക്കപ്പെട്ടാല്‍ അക്കാര്യം രേഖപ്പെടുത്തി കര്‍ശന നടപടികള്‍ കൈക്കൊള്ളണമെന്നും കോടതി നിര്‍ദ്ദേശിച്ചു.

ഇക്കഴിഞ്ഞ മെയ് 12 ന് ഒരു പാര്‍ലമെന്റ് അംഗം വിമാനം റണ്‍വേയിലൂടെ ഓടിക്കൊണ്ടിരിക്കുമ്പോള്‍ വ്യോമയാന മന്ത്രിയുമായി സെല്‍ഫോണില്‍ ബന്ധപ്പെട്ടെന്ന് ആരോപിച്ചു കൊണ്ടുള്ള പൊതു താത്പര്യഹര്‍ജിയുടെ വിചാരണയ്ക്കിടയിലാണ് കോടതി നിര്‍ദ്ദേശം പുറപ്പെടുവിച്ചത്.