ബിജെപിയും മാണി ഗ്രൂപ്പും കരാറുണ്ടാക്കി

കോട്ടയം: ബിജെപിയും കേരള കോണ്‍ഗ്രസ്- മാണി ഗ്രൂപ്പും കോട്ടയം ജില്ലാ പഞ്ചായത്തില്‍ പൊതു സ്ഥാനാര്‍ത്ഥിയെ നിര്‍ത്തി വിജയിപ്പിക്കുന്നതിന് സംയുക്തമായി കരാര്‍ എഴുതി തയ്യാറാക്കി.

കുറവിലങ്ങാട് ജില്ലാ പഞ്ചായത്ത് ഡിവിഷനില്‍ ബിജെപി പ്രവര്‍ത്തകയായ ടി.കെ.സന്ധ്യ മാണി ഗ്രൂപ്പിന്റെയും ബിജെപിയുടെയും സംയുക്ത സ്ഥാനാര്‍ത്ഥിയായിട്ടാണ് മത്സരിച്ചു വിജയിച്ചത്. സ്വതന്ത്രയായി ഉദയസൂര്യന്‍ ചിഹ്നത്തില്‍ മത്സരിച്ച സന്ധ്യ ജില്ലാ പഞ്ചായത്ത് ഭരണസമിതിയില്‍ ഇരു കക്ഷികളുടേയും നിലപാടുകള്‍ക്കനുസരിച്ച് പ്രവര്‍ത്തിക്കുമെന്നാണ് കരാര്‍.

തിരഞ്ഞെടുപ്പ് ഫലം പുറത്തുവന്നതിനു ശേഷം സപ്തംബര്‍ 30നാണ് ഇരു വിഭാഗത്തെയും നേതാക്കള്‍ ചേര്‍ന്ന് കരാറൊപ്പിട്ടത്. മാണി ഗ്രൂപ്പിനു വേണ്ടി പാര്‍ട്ടി സംസ്ഥാന ജനറല്‍ സെക്രട്ടറി പി.എം.മാത്യു, കുറവിലങ്ങാട്ടു നിന്നുള്ള മുന്‍ ജില്ലാ പഞ്ചായത്തംഗം സണ്ണി തെക്കേടം എന്നിവരും ബിജെപിക്കു വേണ്ടി കോട്ടയം ജില്ലാ പ്രസിഡന്റ് രാധാകൃഷ്ണ മേനോന്‍, കര്‍ഷക മോര്‍ച്ച സംസ്ഥാന പ്രസിഡന്റ് പി.ജെ.തോമസ് എന്നിവരും ആണ് കരാറില്‍ ഒപ്പുവെച്ചത്. അവരവരുടെ ലെറ്റര്‍ പാഡില്‍ ഒപ്പുവെച്ച കരാര്‍ ഇരുവിഭാഗവും പരസ്പരം കൈമാറിയിട്ടുണ്ട്.

തിരഞ്ഞെടുപ്പ് വിജയത്തെ തുടര്‍ന്ന് സന്ധ്യയെ ബിജെപി ജില്ലാ കമ്മിറ്റിയില്‍ ഉള്‍പ്പെടുത്തിയിട്ടുണ്ട്.