വിദേശ പാനീയങ്ങളും പടിക്കു പുറത്ത്

കോഴിക്കോട്: പാമോയിലിനു പിന്നാലെ വിദേശ പാനീയങ്ങളും പടിക്കു പുറത്താകുന്നു. പാമോയിലിനെതിരേ ധാര്‍മികസമരം നടത്തി പടിക്കു പുറത്താക്കിയ കോഴിക്കോട് ജില്ലയിലെ അടിവാരം മേഖലയാണ് വിദേശകുത്തകകളുടെ പാനീയങ്ങളെയും ബഹിഷ്കരിച്ച് മാതൃക കാട്ടുന്നത്.

മേഖലയില്‍ വിദേശ പാനീയങ്ങളുടെ ബഹിഷ്കരണ സമരം ശക്തമാകുകയാണ്. സമരത്തിന് വിവിധ സംഘടനകളുടെ ശക്തമായ പിന്തുണയുമുണ്ട്.

കുത്തക പാനീയങ്ങളുടെ ബഹിഷ്കരണത്തിനൊപ്പം നാടെങ്ങും ഇളനീര്‍ പന്തലുകളും ഉയരുന്നുണ്ട്. കഴിഞ്ഞ ദിവസം താമരശേരിയില്‍ യുവജന ഐക്യവേദിയുടെ ആഭിമുഖ്യത്തില്‍ വിദേശ പാനീയങ്ങള്‍ കടകളിലിറക്കുന്നതം തടഞ്ഞു. ഇനി മുതല്‍ വിതരണം നടത്തരുതെന്ന താക്കീത് നല്‍കി വിതരണക്കാരെ മടക്കിയയച്ചു.

ഈങ്ങാപ്പുഴയില്‍ വിദേശപാനീയം റോഡില്‍ ഒഴുക്കുന്ന കര്‍മ്മത്തിന് വ്യാപാരികള്‍ തന്നെ നേതൃത്വം നല്‍കി. ഇനി മേല്‍ വിദേശ പാനീയങ്ങള്‍ കച്ചവടം ചെയ്യില്ലെന്നും വ്യാപാരികള്‍ തീരുമാനിച്ചിട്ടുണ്ട്.