റേഡിയോ കോളര്‍ ഘടിപ്പിച്ച കരിമ്പുലി കാട്ടിലേക്ക്

മുത്തങ്ങ: വനംവകുപ്പിന്റെ കെണിയില്‍ വീണ കരിമ്പുലിയെ കഴുത്തില്‍ റേഡിയോ ട്രാന്‍സ്മിറ്റര്‍ (റേഡിയോ കോളര്‍) ഘടിപ്പിച്ച് നവംബര്‍ 12 ഞായറാഴ്ച ഉച്ചക്ക് മുത്തങ്ങ വനത്തില്‍ വിട്ടു.

പെരുന്തട്ട വനത്തില്‍ നിന്ന് ഒന്‍പതു ദിവസം മുന്‍പ് നവംബര്‍ നാലിനാണ് കരിമ്പുലിയെ വനംവകുപ്പുകാര്‍ കെണിവെച്ച് പിടിച്ചത്.അതിനുശേഷം ഇത്രയും ദിവസം പുലി മുത്തങ്ങ വനത്തില്‍ മിനിലോറിയിലെ ഇരുമ്പഴിക്കൂട്ടിലായിരുന്നു.നവംബര്‍ 12ഞായറാഴ്ച രാവിലെ റേഡിയോ പദ്ധതി നടപ്പിലാക്കുന്നതിന്റെ ഭാഗമായി പുലിയെ വെടിവെച്ച് മയക്കി.

മയക്കുവെടി വിദഗ്ധന്‍ ഡോ.ജേക്കബ് ചീരന്റെ നേതൃത്വത്തിലുള്ള സംഘത്തിനായിരുന്നു ഈ ചുമതല. പുലി പൂര്‍ണ്ണമായും മയക്കത്തിലാകാന്‍ 20മിനിറ്റോളമെടുത്തു.

പൂര്‍ണ്ണമായും മയക്കത്തിലായ പുലിയെ ഷീറ്റിലെടുത്ത് പുറത്തു കാട്ടില്‍ കൊണ്ടുപോയി കിടത്തി.ഡോ.ഈസയും ഡെപ്യൂട്ടി റെയിഞ്ചര്‍ സുരേഷും ചേര്‍ന്ന് റേഡിയോ ട്രാന്‍സ്മിറ്റര്‍ പുലിയുടെ കഴുത്തില്‍ ഘടിപ്പിച്ചു.

തുടര്‍ന്ന് പുലിക്ക് ബോധം വീണ്ടെടുക്കാനുള്ള മരുന്നു നല്കി.2.30ന് എഴുന്നേറ്റ പുലി കാട്ടിലേക്ക് നടന്നു പോയി.

റേഡിയോ കോളറിനകത്ത് ബാറ്ററിയും ആന്റിനയും ട്രാന്‍സ്മിറ്ററും ഉണ്ട് .ഈ കോളറില്‍ നിന്നുള്ള സിഗ്നലുകള്‍ പിടിച്ചെടുക്കാനുള്ള റിസീവറുകള്‍ വനം വകുപ്പധികൃതരുടെ കൈയിലാണ് .ഒരു കിലോമീറ്റര്‍ പരിധിക്കുള്ളില്‍ കരിമ്പുലിയുണ്ടെങ്കില്‍ വനംവകുപ്പുകാര്‍ക്ക് അറിയാം. കരിമ്പുലിയുടെ ചലനങ്ങള്‍ നിരീക്ഷിക്കുകയാണ് ഉദ്ദേശ്യം.