എന്നൂര്‍ വൈദ്യുതി വാങ്ങല്‍ കരാറില്‍ ഏര്‍പ്പെടരുത് :കോടതി

കൊച്ചി: നവംബര്‍ 20 വരെ കേരളം വൈദ്യുതി വാങ്ങല്‍ കരാറുകളിലൊന്നും ഏര്‍പ്പെടരുതെന്ന് കേരളാഹൈക്കോടതി നിര്‍ദ്ദേശം നല്‍കി. നവംബര്‍ 14 ചൊവാഴ്ച ജസ്റ്റീസ് ആര്‍.ഭാസ്കരനാണ് ഈ നിര്‍ദ്ദേശം നല്‍കിയത്.

ദക്ഷിണ്‍ ഭാരതി എനര്‍ജി കണ്‍സോര്‍ഷ്യവുമായി സംസ്ഥാനം വൈദ്യുതിവാങ്ങല്‍ കരാറില്‍ ഏര്‍പ്പെടുന്നതിനെചോദ്യം ചെയ്തു കൊണ്ട് കണ്ണൂര്‍ പവര്‍ പ്രൊജക്ട് ചെയര്‍മാന്‍ കെ. പി.പി.നമ്പ്യാര്‍ നല്‍കിയ ഹര്‍ജി പരിഗണിച്ചാണ് കോടതിയുടെ ഇടക്കാല ഉത്തരവ്.

നവംബര്‍ ആറിന് കേസ് ആദ്യമായി കോടതിയുടെ പരിഗണനയ്ക്കെത്തിയപ്പോള്‍ സംസ്ഥാനം ദക്ഷിണ്‍ ഭാരതിയുമായി കരാറില്‍ ഏര്‍പ്പെടില്ലെന്ന് സര്‍ക്കാരിനു വേണ്ടി അഡ്വക്കേറ്റ് ജനറല്‍ കോടതിയില്‍ സത്യവാങ്മൂലം നല്‍കിയിരുന്നു. എന്നാല്‍ നവംബര്‍ 14 ന് ഈ സത്യവാങ്മൂലം ആവര്‍ത്തിക്കാന്‍ അഡ്വക്കേറ്റ് ജനറല്‍ വിസമ്മതിച്ചു. ഇതേത്തുടര്‍ന്നാണ് കോടതി ഇടക്കാല ഉത്തരവിലൂടെ സര്‍ക്കാര്‍ വൈദ്യുതി വാങ്ങുന്നതിനെ തടഞ്ഞിരിക്കുന്നത്.

ദക്ഷിണ്‍ ഭാരതി കണ്‍സോര്‍ഷ്യം തമിഴ്നാട്ടിലെ എന്നൂര്‍ വൈദ്യുതിനിലയത്തില്‍ ഉത്പാദിപ്പിക്കുന്ന വൈദ്യുതി വാങ്ങാനുള്ള സംസ്ഥാനസര്‍ക്കാരിന്റെ നീക്കവും ഇതിനെ ചോദ്യം ചെയ്തുകൊണ്ടുള്ള കെ. പി.പി നമ്പ്യാരുടെ രംഗപ്രവേശനവും വിവാദമുണ്ടാക്കിയിരുന്നു.

നമ്പ്യാര്‍ ചെയര്‍മാനായി കണ്ണൂരില്‍ സ്ഥാപിക്കാനുദ്ദേശിക്കുന്ന വൈദ്യുതിനിലയത്തില്‍ നിന്നും വൈദ്യുതി വാങ്ങാതെ തമിഴ്നാട്ടിലെ എന്നൂരില്‍ നിന്നും വൈദ്യുതി വാങ്ങാനുള്ള സര്‍ക്കാരിന്റെയും വൈദ്യുതിബോര്‍ഡിന്റെയും നീക്കത്തില്‍ അഴിമതിയുണ്ടെന്നാരോപിച്ചായിരുന്നു നമ്പ്യാര്‍ രംഗത്തെത്തിയത്.

എന്നൂരില്‍ നിന്നും വൈദ്യുതി വാങ്ങാനുള്ള സര്‍ക്കാര്‍ നീക്കത്തെ തടയണമെന്നാവശ്യപ്പെട്ട് നമ്പ്യാര്‍ ഹൈക്കോടതിയെ സമീപിക്കുകയായിരുന്നു.