ടൈറ്റാനിയം: നാട്ടുകാര് സഹകരിക്കണം
തിരുവനന്തപുരം: ട്രാവന്കൂര് ടൈറ്റാനിയം ഫാക്ടറി വീണ്ടും തുറന്നുപ്രവര്ത്തിക്കാന് വേളിയിലെ നാട്ടുകാര് സഹകരിക്കണമെന്ന് മുഖ്യമന്ത്രി ഇ.കെ.നായനാര് ആവശ്യപ്പെട്ടു.
നാട്ടുകാരുടെ പ്രതിനിധികളുമായും ട്രേഡ് യൂണിയന് നേതാക്കളുമായും സര്ക്കാര് പലവട്ടം ചര്ച്ച നടത്തിയിട്ടുണ്ട്. മലിനീകരണപ്രശ്നമാണ് നാട്ടുകാര് ആദ്യം ഉന്നയിച്ചിരുന്നതെങ്കില് ഇപ്പോള് അവര് ഫാക്ടറിയില് 25 ശതമാനം സംവരണം വേണമെന്നാണ് ആവശ്യപ്പെടുന്നത്. ഇത് നടപ്പിലാക്കുക അസാധ്യമാണെന്ന് മുഖ്യമന്ത്രി പറഞ്ഞു. നവംബര് 15 ബുധനാഴ്ച വാര്ത്താലേഖകരോട് സംസാരിക്കുകയായിരുന്നു അദ്ദേഹം.
ചില തസ്കികകളില് നാട്ടുകാര്ക്ക് സംവരണം നല്കാനാവില്ല. മറ്റു ചില തസ്കികകളില് ഇപ്പോള് തന്നെ നാട്ടുകാര്ക്ക് സംവരണം നല്കുന്നുണ്ട്.
ഫാക്ടറിയുടെ പ്രവര്ത്തനം തുടര്ന്നുകൊണ്ടു പോകാന് എതിര്ക്കുന്നവര്ക്കെതിരെ ബലം പ്രയോഗിക്കേണ്ട കാര്യമില്ലെന്ന് ഒരു ചോദ്യത്തിന് മറുപടിയായി നായനാര് പറഞ്ഞു. ഫാക്ടറി വീണ്ടും തുറന്നുപ്രവര്ത്തിക്കുന്നതിനായി ചര്ച്ചകള് തുടരും.