എംപിമാരുടെ യോഗം യുഡിഎഫ് ബഹിഷ്കരിച്ചു

തിരുവനന്തപുരം: മുഖ്യമന്ത്രി ഇ.കെ.നായനാര്‍ നവംബര്‍ 15 ബുധനാഴ്ച വിളിച്ചുകൂട്ടിയ എംപിമാരുടെ യോഗം യുഡിഎഫ് ബഹിഷ്കരിച്ചു. മദ്യദുരന്തവുമായി ബന്ധപ്പെട്ട വിഷയങ്ങള്‍ അജണ്ടയില്‍ ഉള്‍പ്പെടുത്താത്തതില്‍ പ്രതിഷേധിച്ചായിരുന്നു ബഹിഷ്കരണം.

പാരലമെന്റിന്റെ ശീതകാലസമ്മേളനത്തില്‍ അവതരിപ്പിക്കേണ്ട വിഷയങ്ങളെക്കുറിച്ച് ചര്‍ച്ചചെയ്യാന്‍ വിളിച്ചു കൂട്ടിയ യോഗത്തില്‍ എല്‍ഡിഎഫ് എംപിമാരും മന്ത്രിമാരും മാത്രമേ പങ്കെടുത്തുള്ളു.

സംസ്ഥാനത്തെ കര്‍ഷകര്‍ നേരിടുന്ന പ്രശ്നങ്ങള്‍ക്കു പരിഹാരമുണ്ടാക്കാന്‍ ശ്രമിക്കണമെന്ന് യോഗത്തില്‍ മുഖ്യമന്ത്രി നായനാര്‍ എംപിമാരോട് ആവശ്യപ്പെട്ടു. പാമോയില്‍ ഇറക്കുമതി കാരണമുള്ള വെളിച്ചെണ്ണ വിലയിടിവ് കര്‍ഷകരെ ദോഷകരമായി ബാധിച്ചിരിക്കുന്ന കാര്യം അദ്ദേഹം ചൂണ്ടിക്കാട്ടി.

കാര്‍ഷിക മേഖലയെ തകര്‍ക്കുന്ന കേന്ദ്രത്തിന്റെ തെറ്റായ നയങ്ങള്‍ക്കെതിരേ പോരാടാന്‍ മറ്റു ദക്ഷിണേന്ത്യന്‍ സംസ്ഥാനങ്ങളില്‍ നിന്നുള്ള എംപിമാരുമായി സഹകരിച്ചു പ്രവര്‍ത്തിക്കണമെന്നും നായനാര്‍ നിര്‍ദ്ദേശിച്ചു.