മണിച്ചന്റെ ഗോഡൗണില് നിന്ന് സ്പിരിറ്റു പിടിച്ചു
തിരുവനന്തപുരം: അബ്കാരി കോണ്ട്രാക്ടര് മണിച്ചന് ഒളിപ്പിച്ചുവെച്ചിരുന്ന 90,000 ലിറ്റര് സ്പിരിറ്റ് പ്രത്യേക അന്വേഷണസംഘം കണ്ടെടുത്തു.
ചിറയിന്കീഴ് ഇരട്ടക്കലുങ്ക് കുഞ്ചാലുമ്മൂട്ടില് മണിച്ചന്റെ വീടിനു സമീപത്തുള്ള ഹോളോബ്രിക്സ് ഫാക്ടറിയിലെ ഭൂഗര്ഭ അറയില് ഒളിപ്പിച്ചുവെച്ചിരുന്ന സ്പിരിറ്റാണ് കണ്ടെടുത്തത്. നവംബര് 19 ഞായറാഴ്ച രാവിലെ ഐജി സിബി മാത്യുവിന്റെ നേതൃത്വത്തിലുള്ള സംഘം ഇവിടെ റെയ്ഡ് നടത്തുകയായിരുന്നു.
നാമമാത്രമായി ഹോളോബ്രിക്സ് നിര്മ്മാണം നടന്നിരുന്ന ഫാക്ടറിയില് സിമന്റു സ്ലാബുകള്ക്കടിയിലാണ് സ്പിരിറ്റ് സൂക്ഷിച്ചിരുന്നത്. ഇവിടെ നേരത്തെ പൊലീസ് റെയ്ഡു നടത്തിയിരുന്നെങ്കിലും സ്പിരിറ്റു കണ്ടെത്തിയിരുന്നില്ല. മണ്ണുമാന്തി യന്ത്രം ഉപയോഗിച്ച് സിമന്റ് സ്ലാബ് പൊളിച്ചാണ് ഞായറാഴ്ച ഭൂഗര്ഭ അറ കണ്ടെത്തിയത്.
5,000 ലിറ്റര് സംഭരണശേഷിയുള്ള 18 ടാങ്കുകളിലായാണ് സ്പിരിറ്റ് സൂക്ഷിച്ചിരുന്നത്. കല്ലുവാതുക്കല് മദ്യദുരന്ത കേസിലെ മുഖ്യപ്രതിയായ കൊച്ചനിയെ പ്രത്യേക അന്വേഷണസംഘത്തിനു കസ്റഡിയില് ലഭിച്ചിരുന്നു. കൊച്ചനി നല്കിയ വിവരം സ്പിരിറ്റ് കണ്ടെത്താന് സഹായകരമായി എന്നാണ് വിലയിരുത്തല്.
മണിച്ചന് സ്വയം ഇത്രയും സ്പിരിറ്റ് ശേഖരിക്കാനാവില്ലെന്നും രാഷ്ട്രീയക്കാരുടെയും പൊലീസുകാരുടെയും സഹായം ഇതിനുണ്ടായിട്ടുണ്ടെന്ന കാര്യം വ്യക്തമാണെന്നും സംഭവസ്ഥലം സന്ദര്ശിച്ച ഡിജിപി പി.ആര്.ചന്ദ്രന് പറഞ്ഞു. വിശദമായ അന്വേഷണത്തിലൂടെ കുറ്റക്കാരെ പുറത്തുകൊണ്ടു വരുമെന്നും അദ്ദേഹം പറഞ്ഞു.
പിടിച്ചെടുത്ത സ്പിരിറ്റിന് മൊത്തവിപണിയില് 54 ലക്ഷം രൂപ വിലവരും. ഇത് വ്യാജമദ്യമാക്കി വിറ്റാല് നാലു കോടിയിലേറെ രൂപ ലഭിക്കുമെന്ന് ചൂണ്ടിക്കാണിക്കപ്പെടുന്നു.