കൊച്ചി കോര്പ്പറേഷന് യോഗത്തില് ബഹളം
കൊച്ചി: വിവാദമായ ഭൂമി ഇടപാടിനെ ചൊല്ലി കൊച്ചി കോര്പ്പറേഷന് കൗണ്സില് യോഗം പ്രക്ഷുബ്ധമായി. ഭൂമി ഇടപാടിനെ കുറിച്ച് വിജിലന്സ് അന്വേഷണം ആവശ്യപ്പെട്ട് പ്രതിപക്ഷനേതാവ് എന്.വേണുഗോപാല് കൊണ്ടുവന്ന അടിയന്തിരപ്രമേയത്തിന് അനുമതി നിഷേധിച്ചതോടെയാണ് കൗണ്സില് യോഗത്തില് ബഹളമായത്.
പതിവുപോലെ കൗണ്സില് യോഗം ബഹിഷ്കരിച്ച് ഇറങ്ങിപ്പോകാന് പ്രതിപക്ഷം തയാറാകാതിരുന്നതോടെ കൗണ്സില് യോഗം അന്തമില്ലാതെ നീണ്ടു. നവംബര് 20 തിങ്കളാഴ്ച ഉച്ചയ്ക്ക് മൂന്നിന് ആരംഭിച്ച യോഗം വൈകുന്നേരം ഏഴുമണിയോടെയാണ് അവസാനിച്ചത്.
അടിയന്തിരപ്രമേയത്തിന് അനുമതി നിഷേധിക്കപ്പെട്ടതോടെ വിവാദ ഇടപാട് സംബന്ധിച്ച ഫയലുകള് മേശപ്പുറത്ത് വയ്ക്കണമെന്ന് പ്രതിപക്ഷം ആവശ്യപ്പെട്ടു. ഹൈക്കോടതിയുടെ പരിഗണനയിലുള്ള വിഷയമായതിനാല് ചര്ച്ച ചെയ്യാന് കഴിയില്ലെന്നായിരുന്നു മേയര് ദിനേശ്മണിയുടെ നിലപാട്. എന്നാല് സെക്രട്ടറിയെ കൊണ്ട് കാര്യങ്ങള് വിശദീകരിപ്പിക്കാന് മേയര് ശ്രമിക്കുകയും ചെയ്തു. പ്രതിപക്ഷം ഈ ശ്രമം തടസപ്പെടുത്തി.
പ്രശ്നത്തെ കുറിച്ച് അടിയന്തിരപ്രമേയത്തിന് അനുമതി നിഷേധിച്ച് മേയര് യോഗം നിര്ത്തിവെച്ചപ്പോള് പ്രതിപക്ഷം കൗണ്സില് ഹാളില് കുത്തിയിരുന്ന് മുദ്രാവാക്യം വിളിച്ചു. കൗണ്സില് നിര്ത്തിവെച്ച് ചേംബറിലെത്തിയ മേയര് ദിനേശ്മണി ഏതന്വേഷണത്തെയും നേരിടാന് കോര്പ്പറേഷന് തയാറാണെന്ന് വാര്ത്താലേഖകരോട് പറഞ്ഞു.