പെണ്കുട്ടികള് തമ്മിലുള്ള ബന്ധത്തിന് അവസാനമായി
കൊച്ചി: മിനിയും സിഷയും ഇനി ഒരുമിച്ചു ജീവിക്കില്ല. ഏറെ ശ്രദ്ധയാകര്ഷിച്ച രണ്ടു പെണ്കുട്ടികള് തമ്മില് ഒരുമിച്ചുള്ള ജീവിതത്തിന് അവസാനമായി.
കേരള ഹൈക്കോടതിയില് സിഷ മിനിക്കെതിരായ മൊഴി നല്കിയതോടെയാണ് ഈ അപൂര്വബന്ധത്തിന് തിരശ്ശീല വീണത്.
വാരാപ്പുഴയിലെ ഒരു സ്വകാര്യഫാക്ടറയില് ജോലി ചെയ്തിരുന്ന പെണ്കുട്ടികളായ മിനിയും സിഷയും തമ്മില് ഒരുമിച്ചു ജീവിക്കാന് തീരുമാനിച്ചതോടെയാണ് അപൂര്വബന്ധത്തിന് അരങ്ങൊരുങ്ങിയത്.
വാരാപ്പുഴയില് നിന്ന് ഇരുവരും ഒളിച്ചോടി കോയമ്പത്തൂരിലെത്തി കുറച്ചുകാലം ഒന്നിച്ചു ജീവിച്ചതിനു ശേഷം കടമക്കുടിയിലുള്ള മിനിയുടെ വീട്ടില് ജീവിതം തുടങ്ങി. മിനി ആണ്വേഷം കെട്ടിയാണ് നടന്നിരുന്നത്. സംഭവം വിവാദമായതോടെ പ്രശ്നം കോടതിയുടെ മുന്നിലെത്തി. പക്ഷെ പറവൂര് മജിസ്ട്രേറ്റ് കോടതി ഇരുവര്ക്കും ഒരുമിച്ച് താമസിക്കാന് അനുമതി നല്കിയതോടെ വിവാദം തീര്ന്നുവെന്ന് തോന്നി.
എന്നാല് സിഷയെ ചില ബന്ധുക്കള് ചേര്ന്ന് ബലമായി പിടിച്ചുകൊണ്ടുപോയി എന്ന് പരാതിപ്പെട്ട് മിനി ഹൈക്കോടതിയുടെ മുന്നിലെത്തിയതോടെ ഈ ബന്ധം വീണ്ടും ചര്ച്ചാ വിഷയമായി.
എന്നാല് ഹൈക്കോടതിയിലെത്തിയ സിഷ താന് ആരുടെയും തടങ്കലിലല്ലെന്നും സ്വതന്ത്രയായാണ് ജീവിക്കുന്നതെന്നും മൊഴി നല്കിയതോടെ മിനിയ്ക്ക് കൂട്ടുകാരിയെ നഷ്ടപ്പെട്ടു.