ബുഷ് ഫെഡറല്‍ കോടതിയെ സമീപിച്ചു

വാഷിംഗ്ടണ്‍: ഫ്ലോറിഡാ സുപ്രിം കോടതിവിധിക്കെതിരെ ഫെഡറല്‍ സുപ്രിം കോടതിയില്‍ റിപ്പബ്ലിക്കന്‍ പാര്‍ട്ടി സ്ഥാനാര്‍ഥി ജോര്‍ജ് ബുഷ് ഹര്‍ജി നല്‍കി.

നവംബര്‍ 22 ബുധനാഴ്ചയാണ് ബുഷ് ഫെഡറല്‍ സുപ്രിം കോടതിയില്‍ അപ്പീല്‍ നല്‍കിയത്. അമേരിക്കന്‍ പ്രസിഡന്റ് തിരഞ്ഞെടുപ്പ് ഫലം പ്രഖ്യാപിക്കുന്നതില്‍ കൈകൊണ്ട് എണ്ണിയ വോട്ടുകളുടെ എണ്ണവും പരിഗണിക്കണമെന്ന് കഴിഞ്ഞ ദിവസം ഫ്ലോറിഡ സുപ്രിം കോടതി വിധിച്ചിരുന്നു.

അല്‍ ഗോറിന്റെ പരാതി പരിഗണിച്ചായിരുന്നു ഫ്ലോറിഡ സുപ്രിം കോടതി ഈ വിധി പ്രഖ്യാപിച്ചത്.ഈ വിധിക്കെതിരെയാണ് ഇപ്പോള്‍ ബുഷ് അമേരിക്കയിലെ പരമാധികാര നീതിപീഠമായ ഫെഡറല്‍ സുപ്രിംകോടതിയെ സമീപിച്ചിരിക്കുന്നത്. ഇതോടെ അമേരിക്കന്‍ പ്രസിഡന്റ് തിരഞ്ഞെടുപ്പിന്റെ വോട്ടെണ്ണലിലെ നാടകീയതക്ക് ഒന്നു കൂടി പിരിമുറുക്കമേറി.

കൈകൊണ്ട് വോട്ടെണ്ണുന്നത് മൂലം ഫലം അന്തിമമായി നീളുകയാണെന്ന് ഹര്‍ജിയില്‍ ബുഷ് ചൂണ്ടിക്കാട്ടി. കൈകൊണ്ടുള്ള വോട്ടെണ്ണല്‍ സ്ഥാനാര്‍ഥികള്‍ക്ക് കിട്ടിയ വോട്ടുകളുടെ എണ്ണത്തില്‍ തന്നെ മാറ്റം വരുത്താനിടയാക്കുന്നു. ഇത് സ്ഥാനാര്‍ഥികളുടെയും വോട്ടര്‍മാരുടെയും ഭരണഘടനാപരമായ അവകാശങ്ങളുടെ ലംഘനമാണ്.

വോട്ടെണ്ണല്‍ അന്തമില്ലാതെ നീണ്ടുപോകുമ്പോള്‍ സുപ്രിം കോടതി ഇടപെട്ടില്ലെങ്കില്‍ അത് ഭരണഘടനാപരമായ പ്രതിസന്ധിയുണ്ടാക്കുമെന്ന് ഹര്‍ജിയില്‍ പറയുന്നു.