ഭൂമിക്കടിയിലും വ്യാജമദ്യനിര്മ്മാണം
പാലക്കാട് : ഭൂമിക്കടിയിലും വ്യാജമദ്യനിര്മ്മാണ കേന്ദ്രം കണ്ടെത്തി. കൊഴിഞ്ഞാമ്പാറയിലാണ് ഭൂഗര്ഭ വ്യാജമദ്യനിര്മ്മാണ കേന്ദ്രം പൊലീസ് കണ്ടെത്തിയത്.
അബ്കാരി കരാറുകാരനായ സി.ഡി.സന്തോഷിന്റെ കരിമണ്ണിലുള്ള ഇരുപതോളം ഏക്കര് വിസ്തീര്ണ്ണം വരുന്ന തോട്ടത്തിനടിയിലാണ് വ്യാജമദ്യനിര്മ്മാണം നടന്നുവന്നത്. നവംബര് 24 വെള്ളിയാഴ്ച ജില്ലാ പൊലീസ് സൂപ്രണ്ട് ടോമിന് തച്ചങ്കരിയുടെ നേതൃത്വത്തില് നടന്ന റെയ്ഡിലാണ് ഭൂഗര്ഭ വ്യാജനിര്മ്മാണ കേന്ദ്രം കണ്ടെത്തിയത്.
തേങ്ങയും മറ്റും സൂക്ഷിക്കാനെന്ന് പറഞ്ഞ് നിര്മ്മിച്ചിരുന്ന ഷെഡിനുള്ളിലൂടെയാണ് ഭൂഗര്ഭ മുറിയിലേക്കുള്ള വഴി തയാര് ചെയ്തിരുന്നത്. തേങ്ങയും വിറകും മാറ്റിയപ്പോഴാണ് പൊലീസ് സംഘം വഴി കണ്ടുപിടിച്ചത്.
വൈദ്യുതി കണക്ഷനും ഫാനും മോട്ടറും ഉള്പ്പടെയുള്ള എല്ലാ സജ്ജീകരണങ്ങളോടും കൂടിയതാണ് അറ. ഇവിടെ നിന്നും നിരവധി കുപ്പികള് കണ്ടെടുത്തിട്ടുണ്ട്. എന്നാല് റെയ്ഡ് മണത്തറിഞ്ഞ സംഘം മദ്യനിര്മ്മാണത്തിനുള്ള സാമഗ്രികളെല്ലാം മാറ്റിയിരുന്നു.