രണ്ടാം ഘട്ട വോട്ടെടുപ്പ് സമാധാനപരം

തിരുവനന്തപുരം: സംസ്ഥാനത്ത് തദ്ദേശസ്വയംഭരണസ്ഥാപനങ്ങളിലേക്ക് നടന്ന രണ്ടാം ഘട്ട വോട്ടെടുപ്പ് സമാധാനപരമായി നടന്നു. ചിലയിടങ്ങളില്‍ ഒറ്റപ്പെട്ട അക്രമസംഭവങ്ങളുണ്ടായി.

തിരഞ്ഞെടുപ്പ് നടക്കാന്‍ ബാക്കിയുള്ള സീറ്റുകളിലേക്കാണ് നവംബര്‍ 25 ശനിയാഴ്ച വോട്ടെടുപ്പ് നടന്നത്. ഇതോടെ മലപ്പുറം ജില്ലാ പഞ്ചായത്തിലൊഴികെ എല്ലായിടത്തും വോട്ടെടുപ്പ് പൂര്‍ണമായി. മലപ്പുറത്ത് ജനുവരിയിലാണ് വോട്ടെടുപ്പ് നടക്കുക.

കാസര്‍ക്കോട്ട് 62 ശതമാനം പോളിംഗുണ്ടായി. കാസര്‍ക്കോട്ടുണ്ടായ അക്രമസംഭവങ്ങളില്‍ ആറ് യുഡിഎഫുകാര്‍ക്കും ഒരു സിപിഎമ്മുകാരനും പരിക്കേറ്റു.

കണ്ണൂരില്‍ തിരഞ്ഞെടുപ്പ് നടക്കാന്‍ ബാക്കിയുള്ള സീറ്റുകളില്‍ കനത്താ സുരക്ഷാ സന്നാഹത്തോടെയാണ് വോട്ടെടുപ്പ് നടന്നത്. രാമന്തളിയില്‍ വോട്ട് ചെയ്യാന്‍ പോയ യുഡിഎഫുകാരെ എല്‍ഡിഎഫുകാര്‍ തടഞ്ഞുവെച്ചുവെന്ന് ആരോപണമുണ്ടായി. ചിലയിടങ്ങളില്‍ റീപോളിംഗ് നടത്തണമെന്ന് ആവശ്യപ്പെട്ട് യുഡിഎഫ് തിരഞ്ഞെടുപ്പ് കമ്മിഷന് പരാതി നല്‍കിയിട്ടുണ്ട്. 72 ശതമാനം പോളിംഗാണ് ഇവിടെയുണ്ടായത്.

വയനാട്ടില്‍ 62 ശതമാനവും തൃശൂരില്‍ 60 ശതമാനവും പോളിംഗ് നടന്നു. ഇടുക്കി-65, ആലപ്പുഴ-61, എറണാകുളം-55 എന്നിങ്ങനെയാണ് മറ്റു ജില്ലകളിലെ പോളിംഗ്നില. ഈ ജില്ലകളിലെല്ലാം വോട്ടെടുപ്പ് സമാധാനപരമായിരുന്നു.