സംസ്ഥാനത്ത് അബ്കാരി റെയ്ഡിനു സാധ്യത

തിരുവനന്തപുരം: സംസ്ഥാനത്തെ പ്രമുഖരായ അബ്കാരികളുടെ വീടുകളിലും ഗോഡൗണുകളിലും റെയ്ഡിനു സാധ്യത. ഭൂരിഭാഗം അബ്കാരികള്‍ക്കും രഹസ്യ ഗോഡൗണുകളും സ്പിരിറ്റ് സംഭരണ സൗകര്യങ്ങളുമുണ്ടെന്ന് വ്യക്തമായ അറിവു ലഭിച്ചതിനെ തുടര്‍ന്ന് പൊലീസ് ഇവിടങ്ങളില്‍ റെയ്ഡിനുള്ള തയ്യാറെടുപ്പുകള്‍ നടത്തുകയാണ്.

വിഷമദ്യ ദുരന്തത്തില്‍ പ്രതിയായ മണിച്ചന്റെ ഗോഡൗണുകളില്‍ നിന്ന് ഒരു ലക്ഷം ലിറ്റര്‍ സ്പിരിറ്റ് കണ്ടെത്തിയതാണ് റെയ്ഡിനെക്കുറിച്ച് ആലോചിക്കാന്‍ പൊലീസിന് പ്രേരകമായത്. സംസ്ഥാനത്ത് എണ്ണൂറോളം രഹസ്യ ഗോഡൗണുകളുണ്ടെന്നാണ് അനൗദ്യോഗിക വിലയിരുത്തല്‍.

വിഷമദ്യ ദുരന്തത്തെ കുറിച്ചുള്ള അന്വേഷണം മണിച്ചന്റെ സങ്കേതങ്ങളില്‍ മാത്രമായി ഒതുക്കാന്‍ ശ്രമം നടത്തുന്നതായി ആക്ഷേപമുയര്‍ന്നിട്ടുണ്ട്. മണിച്ചനെ കുടുക്കാന്‍ അദ്ദേഹത്തോടു വിരോധമുള്ള അബ്കാരികള്‍ ആസൂത്രണം ചെയ്തതാണ് മദ്യദുരന്തമെന്ന ആരോപണവും നിലനില്ക്കുന്നു.

ഈ സാഹചര്യത്തിലാണ് കഴിയുന്നത്ര വിവരം ശേഖരിച്ച് സംശയമുള്ള അബ്കാരികളുടെ താവളങ്ങള്‍ റെയ്ഡു ചെയ്യാന്‍ പൊലീസ് തയ്യാറെടുക്കുന്നത്.