എലിവാല്‍ അരവണയില്‍ വീണത് പാക്കിംഗ് വേളയില്‍

തിരുവനന്തപുരം: ശബരിമലയില്‍ നിന്നു വിതരണം ചെയ്ത അരവണപ്രസാദത്തില്‍ വീണ എലിവാല്‍ പ്രസാദം പായ്ക്ക് ചെയ്തപ്പോഴോ അതിനു ശേഷമോ ആണ് കടന്നു കൂടിയതെന്നു സൂചന. ഇതു സംബന്ധിച്ച് കേരള കാര്‍ഷിക സര്‍വകാലാശാലയുടെ എന്റമോളജി വകുപ്പ് നടത്തിയ പരിശോധനയില്‍ അധികം പഴക്കമില്ലാത്ത വാല്‍ ആയിരുന്നു പായസത്തില്‍ കാണപ്പെട്ടതെന്ന് വ്യക്തമായി.

പായസത്തില്‍ കിടന്നു വെന്ത അവസ്ഥയിലായിരുന്നില്ലെന്നും കണ്ടെത്തി. ചുണ്ടെലി വര്‍ഗത്തില്‍ പെട്ട ഷ്രൂ എന്ന ജീവിയുടെ വാലാണെന്നും കണ്ടെത്തിയിട്ടുണ്ട്. എലിവാല്‍ മൂര്‍ച്ചയേറിയ ആയുധം ഉപയോഗിച്ച് മറിച്ചു മാറ്റിയിരുന്നതായും തെളിഞ്ഞു.

പായസത്തിന്റെ മൂന്ന് സാമ്പിളുകളാണ് പബ്ലിക് അനലിസ്റ്റ് പരിശോധിച്ചത്. തുറന്ന ടിന്നിലുണ്ടായിരുന്ന അരവണയില്‍ എലിയുടേതെന്നു തോന്നിക്കുന്ന വാലും രോമങ്ങളും കണ്ടെത്തിയതായി റിപ്പോര്‍ട്ടില്‍ പറയുന്നു.

എലിവാല്‍ അടങ്ങിയ അരവണ ലഭിച്ചെന്നു പറയപ്പെടുന്ന ആളുടെ വീട്ടില്‍ നിന്നും പരിശോധനയ്ക്കായി എടുത്ത സീല്‍ ചെയ്ത രണ്ടു ടിന്നുകളിലെ പായസവും പരിശോധിച്ചിരുന്നു. ഇവയില്‍ എലിയുടെ രോമം കണ്ടെത്തിയില്ല. പകരം ഇഞ്ചിനാരാണ് ഉള്ളതെന്ന് പബ്ലിക് അനലിസ്റ്റിന്റെ റിപ്പോര്‍ട്ടില്‍ പറയുന്നു.