പത്തനംതിട്ടയില്‍ വന്‍ സ്പിരിറ്റ് വേട്ട

പത്തനംതിട്ട: പന്തളത്തിനടുത്ത് കുളനടയില്‍ വന്‍തോതില്‍ വ്യാജ സ്പിരിറ്റ് പിടിച്ചു. ഡിസംബര്‍ ഒന്ന് വെള്ളിയാഴ്ച കുളനടയിലുള്ള നാലുവീടുകളില്‍ നിന്നായി 29,000 ലിറ്റര്‍ സ്പിരിറ്റാണ് പിടിച്ചത്.

അടുത്തയിടെ കല്ലുവാതുക്കല്‍, പള്ളിക്കല്‍ വിഷമദ്യ ദുരന്തക്കേസിലെ മുഖ്യ പ്രതി മണിച്ചന്റെ രഹസ്യ സങ്കേതങ്ങളില്‍ നിന്നും 90,000 ല്‍ അധികം ലിറ്റര്‍ സ്പിരിറ്റ് പിടിച്ചതിനു ശേഷം ഉണ്ടാകുന്ന ഏറ്റവും വലിയ സ്പിരിറ്റ് വേട്ടയാണിത്.

30 ലക്ഷം രൂപ വിലമതിക്കുന്ന സ്പിരിറ്റാണ് പിടിച്ചത്. ഇത് ചാരായമാക്കി വിറ്റാല്‍ ഏഴ് കോടി രൂപ വിലമതിക്കും. പത്തനം തിട്ടയിലെ പ്രമുഖ കള്ള് കോണ്‍ട്രാക്ടര്‍ ബിജു തോമസിന്റെ ജോലിക്കാര്‍ വാടകയ്ക്കു താമസിച്ചിരുന്ന വീടുകളില്‍ നിന്നായിരുന്നു സ്പിരിറ്റ് പിടിച്ചെടുത്തത്.

പത്തനം തിട്ട ജില്ലയിലെ പ്രമുഖ അബ്കാരികളെ കേന്ദ്രീകരിച്ച് പൊലീസ് അന്വേഷണം ആരംഭിച്ചിട്ടുണ്ട്.