സര്ക്കാര് ചെലവില് വിദേശ യാത്രയാകാമെന്ന് മുഖ്യമന്ത്രി
തിരുവനന്തപുരം: സര്ക്കാര് ചെലവില് താന് വിദേശയാത്ര നടത്തുന്നതു കൊണ്ട് കുഴപ്പമൊന്നുമില്ലെന്ന് മുഖ്യമന്ത്രി ഇ കെ നായനാര്. സംസ്ഥാനത്തെ സാമ്പത്തിക പ്രതിസന്ധിക്കിടെ മുഖ്യമന്ത്രി വിദേശയാത്ര നടത്തുന്നതിനെക്കുറിച്ച് പത്രലേഖകര് ചോദിച്ചപ്പോഴായിരുന്നു മുഖ്യമന്ത്രിയുടെ ഉത്തരം.
താന് പോകുന്നത് ഹൃദയത്തിന്റെ ചികിത്സയ്ക്കാണെന്നും രണ്ടു ദിവസം മലേഷ്യയിലും ബാക്കി ലണ്ടനിലുമാണെന്ന് മുഖ്യമന്ത്രി പറഞ്ഞു.
സംസ്ഥാനത്തെ സാമ്പത്തിക പ്രതിസന്ധിയെക്കുറിച്ച് സര്ക്കാര് ധവള പത്രം ഇറക്കേണ്ട കാര്യമില്ലെന്നും വിവരമില്ലാത്തവര്ക്കായുള്ളതാണ് ധവളപത്രമെന്നും മുഖ്യമന്ത്രി പറഞ്ഞു. പത്രം വായിക്കുന്നവര്ക്ക് ധവളപത്രം ആവശ്യമില്ലെന്നും നായനാര് ചൂണ്ടിക്കാട്ടി.
കേരളത്തിന്റെ സാമ്പത്തിക സ്ഥിതി ഇന്ത്യയുടെയത്രയും മോശമല്ലെന്നും കേരളത്തില് കോണ്ഗ്രസ് ഭരിച്ചിരുന്നപ്പോള് പത്ത് - പന്ത്രണ്ട് തവണ ട്രഷറി പൂട്ടിയിട്ടുണ്ടെന്നും മുഖ്യമന്ത്രി പറഞ്ഞു.
പ്രതിപക്ഷ നേതാവ് എ.കെ. ആന്റണിക്ക് കേരള പൊലീസിനെ വിശ്വാസമില്ലാത്തതു കൊണ്ടാണ് വിഷമദ്യദുരന്തത്തെക്കുറിച്ച് സി ബി ഐ അന്വേഷിക്കണമെന്ന് ആവശ്യപ്പെടുന്നതെന്നും നായനാര് അഭിപ്രായപ്പെട്ടു.