കുംഭമേളയ്ക്ക് പ്രത്യേക വെബ്സൈറ്റ്

അലഹബാദ് : പുതുസഹസ്രാബ്ദത്തിലെ ആദ്യത്തെ കുംഭമേള ഇന്റര്‍നെറ്റില്‍ . 2001 ജനുവരിയില്‍ നടക്കുന്ന കുംഭമേളയോടനുബന്ധിച്ച് തുറക്കും. വൈബ്സൈറ്റില്‍ കുംഭമേളയെ സംബന്ധിച്ച എല്ലാ വിവരങ്ങളും ഉണ്ടായിരിക്കുമെന്ന് കുംഭമേള ഓഫീസര്‍ ജീവേഷ് നന്ദന്‍ അറിയിച്ചു.

വിനോദ സഞ്ചാരികള്‍ക്കും തീര്‍ത്ഥാടകര്‍ക്കും ഇ-മെയില്‍ സൗകര്യവും കുംഭമേള നടക്കുന്നയിടത്ത് സജ്ജീകരിക്കും. അഞ്ച് കംപ്യൂട്ടര്‍വത്കൃത ഇന്‍ഫര്‍മേഷന്‍ സെന്ററുകള്‍, 30 ഇലക്ട്രോണിക് ഡിസ്പ്ലേ ബോര്‍ഡുകള്‍ എന്നിവയും ഏര്‍പ്പെടുത്തും.

മേളയുടെ ഓരോ പ്രദേശങ്ങളിലും പോസ്റ്റ് ഓപീസുകള്‍ തുറക്കും. ടെലിഫോണ്‍ സംവിധാനവും മെച്ചപ്പെടുത്തും. ഓരോ പ്രദേശത്തും ടെലിഫോണ്‍ എക്സ്ചേഞ്ചുകള്‍ , 250 ഓളം പി സി ഒ കള്‍, 3,000 ല്‍ അധികം താത്കാലിക ഫോണ്‍ കണക്ഷനുകള്‍ തുടങ്ങിയ സൗകര്യങ്ങളും ഏര്‍പ്പെടുത്തും.

തീര്‍ത്ഥാടകര്‍ക്കും വിനോദ സഞ്ചാരികള്‍ക്കുമായി റെയില്‍വേയും പ്രത്യേക സൗകര്യങ്ങള്‍ ഏര്‍പ്പെടുത്തിയിട്ടുണ്ട്. 30 പ്രത്യേക തീവണ്ടികള്‍ മേള സ്ഥലത്തേയ്ക്ക് ഏര്‍പ്പെടുത്തും. മേള പ്രദേശത്ത് രണ്ട് റെയില്‍വേ ടിക്കറ്റ് കൗണ്ടറുകള്‍ തുറക്കും.

തീര്‍ത്ഥാടകര്‍ക്ക് പാചകത്തിനുള്ള സൗകര്യങ്ങളും ഏര്‍പ്പെടുത്തുമെന്ന് മേള ഓഫീസര്‍ അറിയിച്ചു.