മന്ത്രിമാരെ സെക്രട്ടറിയേറ്റില് കയറ്റരുത്: കരുണാകരന്
തിരുവനന്തപുരം: കണ്ണൂരിലെ അക്രമം തടയുന്നതില് സര്ക്കാര് പരാജയപ്പെട്ടതിനാല് ഒരൊറ്റ മന്ത്രിമാരെ പോലും സെക്രട്ടറിയേറ്റില് കയറ്റരുതെന്ന് കോണ്ഗ്രസ് നേതാവ് കെ. കരുണാകരന് പറഞ്ഞു.
കണ്ണൂര് കത്തിയെരിയുമ്പോള് വിദേശയാത്രയ്ക്കു പോയ മുഖ്യമന്ത്രി പറയുന്നത് കണ്ണൂര് പ്രശ്നം ജനങ്ങള് തന്നെ പരിഹരിക്കണമെന്നാണ്. മറ്റ് മന്ത്രിമാര്ക്കും ഇതിന് സമയമില്ല. അതുകൊണ്ട് ജനങ്ങള് മന്ത്രിമാരെ സെക്രട്ടറിയേറ്റില് കയറ്റാതിരുന്നാല് കുറ്റം പറയാനാവില്ലെന്ന് ഡിസംബര് ആറ് ബുധനാഴ്ച വാര്ത്താലേഖകരോട് സംസാരിക്കവെ കരുണാകരന് പറഞ്ഞു.
പട്ടാളത്തെ വിളിച്ചതുകൊണ്ടോ കേന്ദ്രം ഇടപെട്ടതുകൊണ്ടോ കണ്ണൂര് പ്രശ്നം പരിഹരിക്കാനാവില്ലെന്ന് കരുണാകരന് പറഞ്ഞു. സിപിഎമ്മിലെയും ബിജെപിയിലെയും നേതാക്കള് തന്നെ ഇതിന് മുന്കൈയെടുക്കണം. കണ്ണൂര് പ്രശ്നത്തില് ഇനിയും കൈയും കെട്ടി നോക്കിനില്ക്കാനാവില്ല. ഉടന് തന്നെ ഇതിനെ കുറിച്ച് യുഡിഎഫ് ചര്ച്ച ചെയ്യുമെന്നും കരുണാകരന് അറിയിച്ചു.