സി.എ.അബൂബക്കര് അന്തരിച്ചു
കോഴിക്കോട്: പ്രശസ്ത മാപ്പിളപ്പാട്ടു ഗായകനും ഹിന്ദുസ്ഥാനി സംഗീതജ്ഞനുമായ സി.എ.അബൂബക്കര്(70) ഡിസംബര് ഏഴ് വ്യാഴാഴ്ച അന്തരിച്ചു.
മലബാര് തലത് എന്നറിയപ്പെട്ടിരുന്ന ഇദ്ദേഹം മാപ്പിളപ്പാട്ടിന്റെ മേഖലയില് അഞ്ചു പതിറ്റാണ്ടുകാലം സജീവ സാന്നിധ്യമായിരുന്നു. 1939ലാണ് അബൂബക്കര് ആലാപന രംഗത്തെത്തിയത്. സ്ത്രീശബ്ദത്തിലുള്ള ഗാനങ്ങള് പാടി പ്രശസ്തിയാര്ജ്ജിച്ചു. ഓളവും തിരവും, തൊമ്മന്റെ മക്കള്, ഒരേ തൂവല്പക്ഷികള് എന്നീ സിനിമകളിലും പിന്നണി പാടിയിട്ടുണ്ട്.
പ്രശസ്ത ഹിന്ദുസ്ഥാനി ഗായകന് എസ്.എം.കോയയുടെ കീഴില് സംഗീതമഭ്യസിച്ച കോഴിക്കോട് അബ്ദുള് ഖാദര്, ബാബുരാജ്, യേശുദാസ് എന്നിവരോടൊപ്പം സംസ്ഥാനത്തിനകത്തും പുറത്തും ഒട്ടേറെ പരിപാടികളില് പങ്കെടുത്തിട്ടുണ്ട്.
ആകാശവാണിയില് 35 വര്ഷത്തോളം മാപ്പിള ഭക്തിഗാനങ്ങള് ആലപിച്ചിരുന്നു. ലക്ഷദ്വീപുകാരുടെ മഹല് ഭാഷയിലും പാടിയിട്ടുണ്ട്. 1988ല് അബൂബക്കറിന് സംഗീത നാടക അക്കാഡമി അവാര്ഡ് ലഭിച്ചു.
കദീജാബിയാണ് അബൂബക്കറിന്റെ ഭാര്യ. നൂര് മുഹമ്മദ്, മെഹബൂബ്, സലീം, ഇക്ബാല്, ഷമീമ, സറീന, റസിയ എന്നിവര് മക്കളാണ്. മുസ്തഫ, കോയമോന്, മജീദ് എന്നിവര് മരുമക്കളും.