നവാസ് ഷെരീഫിന് മാപ്പു നല്കുന്നു?

ഇസ്ലാമാബാദ്: ജീവപര്യന്തം തടവുശിക്ഷയ്ക്കു വിധിക്കപ്പെട്ട പാകിസ്താനിലെ മുന്‍ പ്രധാനമന്ത്രി നവാസ് ഷെരീഫിന് സെനിക ഭരണകൂടം മാപ്പു നല്കുന്നു.

ഇതിനു പകരമായി ഷെരീഫ് പത്തു വര്‍ഷത്തെ പ്രവാസി ജീവിതം നയിക്കേണ്ടി വരും. അദ്ദേഹത്തിന്റെ പാര്‍ട്ടിയായ പാകിസ്താന്‍ മുസ്ലീം ലീഗ് വൃത്തങ്ങള്‍ ഡിസംബര്‍ ഒമ്പത് ശനിയാഴ്ച അറിയിച്ചതാണ് ഇക്കാര്യം.

കരാറനുസരിച്ച് നവാസ് ഷെരീഫ് ഡിസംബര്‍ 10 ഞായറാഴ്ച തന്നെ സൗദി അറേബ്യയിലേക്കു പോകാന്‍ സാധ്യതയുണ്ടെന്നും പാര്‍ട്ടി വൃത്തങ്ങള്‍ അറിയിച്ചു. എന്നാല്‍ നവാസ് ഷെരീഫിന്റെ ഭാര്യ കുത്സും നവാസ് ഈ വാര്‍ത്ത ഇതുവരെ സ്ഥിരീകരിച്ചിട്ടില്ല.

ഹൃദ്രോഗ ചികിത്സയ്ക്കായി വിദേശത്തു പോകാന്‍ നവാസ് ഷെരീഫ് അനുമതി തേടിയിട്ടുണ്ടെന്ന് പാകിസ്താനിലെ ഇന്‍ഫര്‍മേഷന്‍ വകുപ്പ് മേധാവി അന്‍വര്‍ മെഹമൂദ് വെളിപ്പെടുത്തി. എന്നാല്‍ ഷെരീഫിന് മാപ്പു നല്കിയതായുള്ള വാര്‍ത്തകളെക്കുറിച്ച് പ്രതികരിക്കാന്‍ അദ്ദേഹം വിസമ്മതിച്ചു.