കെഎസ്യുക്കാരനെ നനാക്കി മര്‍ദ്ദിച്ചെന്ന് പരാതി

കൊല്ലം: കൊല്ലം എസ്എന്‍ കോളേജിലെ കെഎസ്യു പ്രവര്‍ത്തകനെ ഒരു കൂട്ടം എസ്എഫ്ഐക്കാര്‍ നനാക്കി മര്‍ദ്ദിച്ചെന്ന് പരാതി. കോളേജിലെ കെഎസ്യു യൂണിറ്റ് കമ്മിറ്റി ജനറല്‍ സെക്രട്ടറി പി. പ്രതീഷ് കുമാര്‍ (21) ആണ് പരാതിക്കാരന്‍.

പുറത്ത് അടിയേറ്റ പാടുകളോടെ പ്രതീഷിനെ കൊല്ലം ജില്ലാ ആശുപത്രിയില്‍ പ്രവേശിപ്പിച്ചിരിക്കുകയാണ്. ഈസ്റ്റ് പൊലീസ് കേസ്സെടുത്തിട്ടുണ്ട്.

ഒന്നാം വര്‍ഷ ബിരുദ വിദ്യാര്‍ത്ഥിയായ പ്രതീഷ് ഡിസംബര്‍ എട്ട് വെള്ളിയാഴ്ച വൈകുന്നേരം പരീക്ഷ കഴിഞ്ഞ് പോകുമ്പോഴായിരുന്നു അക്രമം. ലൈബ്രറി ഹാളിനു മുന്നില്‍ വെച്ച് തന്നെ വളഞ്ഞ എസ്എഫ്ഐക്കാര്‍ ഇനി കെഎസ്യുവില്‍ പ്രവര്‍ത്തിക്കില്ലെന്ന് സത്യം ചെയ്യിക്കുകയും എസ്എഫ്ഐക്ക് സിന്ദാബാദ് വിളിപ്പിക്കുകയും ചെയ്തുവെന്ന് പ്രതീഷ് പരാതിയില്‍ പറഞ്ഞു. കോളേജ് എസ്എഫ്ഐ ഭാരവാഹികളായ സുജിമോന്‍ സുധാകരന്‍, സജി തോമസ്, റാഷ്ലിന്‍ എന്നിവരെ പേരെടുത്ത് പരാതിയില്‍ കുറ്റപ്പെടുത്തിയിട്ടുണ്ട്.

തിരുവനന്തപുരം നിലമേല്‍ കോളേജിലെ നിഷാദിനെപ്പോലെ ആളാകാന്‍ ശ്രമിക്കേണ്ടയെന്നും അങ്ങിനെ ചെയ്താല്‍ പുറത്തുള്ളവരെ കൊണ്ട് അടിപ്പിക്കുമെന്നും അവര്‍ ഭീഷണിപ്പെടുത്തിയതായി പരാതിയില്‍ പറയുന്നു.