പുലി ഭീതി പരത്തി; തിരച്ചില് തുടരുന്നു
കൊച്ചി: ഏലൂരില് ഡിസംബര് ഒമ്പത് ശനിയാഴ്ച കണ്ട പുലിക്കു വേണ്ടി ഞായറാഴ്ചയും തിരച്ചില് തുടരുന്നു. ഫാക്ട് അമോണിയ പ്ലാന്റിന്റെ പരിസരത്താണ് പുലിയെ കണ്ടിരുന്നത്. അവിടെ ഒരു ആടിനെക്കെട്ടി പുലിയെ ആകര്ഷിക്കാന് ശ്രമം നടത്തിയെങ്കിലും വിജയിച്ചില്ല.
അമോണിയ പ്ലാന്റും പെട്രോകെമിക്കല് കോംപ്ലക്സും സ്ഥിതി ചെയ്യുന്ന 35 ഏക്കര് സ്ഥലത്തെ പൊന്തക്കാട്ടിലാണ് പുലി മറഞ്ഞിരിക്കുന്നത് എന്ന് കരുതുന്നു. പുലിയിറങ്ങിയതിനെ തുടര്ന്ന് ഏലൂരില് ഇപ്പോഴും ആശങ്ക നിലനില്ക്കുകയാണ്. പ്ലാന്റിനു സമീപമുള്ള ഫാക്ട് ക്വാര്ട്ടേഴ്സുകളിലെ താമസക്കാര് ഒഴിഞ്ഞു പോയി. പൊലീസും നാട്ടുകാരുടെ സ്ക്വാഡുകളും നിരത്തുകളില് കാവല് നില്ക്കുന്നുണ്ട്.
ശനിയാഴ്ച രാവിലെ പത്തരയ്ക്ക് അമോണിയ പ്ലാന്റിലെ നാഫ്ത ഫര്ണസ് യാര്ഡ് റൂമില് നില്ക്കുമ്പോള് ടെക്നീഷ്യന് എം. ജയശങ്കറാണ് പുലിയെ കണ്ടത്. നാഫ്ത സ്റോറേജ് ടാങ്കിനു മുകളില് വിരിച്ചിട്ടുള്ള മണലില് കണ്ട കാല്പാടുകള് പുലിയുടേതാണ് വനംവകുപ്പ് ഉദ്യോഗസ്ഥര് ശരിവെച്ചതോടെ പ്രദേശത്ത് ഭീതി പരന്നു.
തെളിവുകള് പ്രകാരം മാസങ്ങളായി പുലി പ്ലാന്റ് വളപ്പിലുണ്ടായിരുന്നെന്നാണ് വനം വകുപ്പ് അധികൃതര് അനുമാനിക്കുന്നത്. ഇതിനു മുമ്പ് കുര്യച്ചന് എന്ന ടെക്നീഷ്യനും പ്ലാന്റ് വളപ്പില് പുലിയെ കണ്ടിരുന്നു. കൂടാതെ പ്രദേശത്തുള്ള തെരുവുനായ്ക്കളില് അടുത്തിടെയായി കുറവു കാണുന്നുമുണ്ടത്രെ. പ്രദേശത്തിനടുത്തെ കാട് 20 മീറ്റര് അകലെയുള്ള മലയാറ്റൂര് കാടാണ്. അവിടെ നിന്ന് ഏലൂരില് പുലി എങ്ങനെ എത്തി എന്നതും വനംവകുപ്പ് ഉദ്യോഗസ്ഥരെ അത്ഭുതപ്പെടുത്തുന്നു.