നെടുമ്പാശ്ശേരിയില്‍ ആള്‍മാറാട്ടം

കൊച്ചി: മറ്റൊരാളുടെ പാസ്പോര്‍ട്ടുപയോഗിച്ച് മസ്കറ്റില്‍ നിന്നെത്തിയ യുവാവ് നെടുമ്പാശ്ശേരി വിമാനത്താവളത്തില്‍ പിടിയിലായി.

മസ്കറ്റില്‍ നിന്നും എസി 974 വിമാനത്തില്‍ ഡിസംബര്‍ 15 വെള്ളിയാഴ്ച വന്നിറങ്ങിയ ആലുവ ഉളിയന്നൂര്‍ സ്വദേശി ജമാലിനെയാണ് എമിഗ്രേഷന്‍ വിഭാഗം പിടികൂടിയത്. ഇയാളുടെ പക്കല്‍ അപ്പു ചന്ദ്രികവീര, പാറശ്ശേരി, തിരുവനന്തപുരം എന്ന പേരിലുള്ള പാസ്പോര്‍ട്ടാണ് ഉണ്ടായിരുന്നത്. പാസ്പോര്‍ട്ടിലെ ഫോട്ടോയും ജമാലിന്റേതായിരുന്നില്ല.

ജമാലിന്റെ കൈവശമുണ്ടായിരുന്ന പാസ്പോര്‍ട്ടിന്റെ കാലാവധി കഴിഞ്ഞിരുന്നതായി എമിഗ്രേഷന്‍ അധികൃതര്‍ പറഞ്ഞു. എന്നാല്‍ പാസ്പോര്‍ട്ടിലും യാത്രാരേഖകളിലും ഒരേ ഒപ്പുകളാണുണ്ടായിരുന്നത്.

മസ്കറ്റില്‍ എസി മെക്കാനിക്ക് ആയിരുന്നുവെന്നും സ്പോണ്‍സറും മസ്കറ്റ് പൊലീസും ചേര്‍ന്ന് വിമാനത്തില്‍ കയറ്റി വിടുകയായിരുന്നുവെന്നും ജമാല്‍ അധികൃതരോടു പറഞ്ഞു. തന്റെ പാസ്പോര്‍ട്ട് സ്പോണ്‍സര്‍ പിടിച്ചുവെച്ചിരിക്കുകയാണെന്നു പറഞ്ഞ ജമാലിന്റെ ബാഗില്‍ നിന്ന് അയാളുടെ പാസ്പോര്‍ട്ടിന്റെ കോപ്പിയും അധികൃതര്‍ കണ്ടെടുത്തു.