മുല്ലപ്പെരിയാറില്‍ പുതിയ വിള്ളലുകള്‍

മുല്ലപ്പെരിയാര്‍: മുല്ലപ്പെരിയാര്‍ അണക്കെട്ടില്‍ പുതിയ വിള്ളലുകള്‍ കണ്ടെത്തി. കുമ്മായം കൊണ്ടുള്ള പ്ലാസ്ററിംഗ് അടര്‍ന്ന് പലയിടത്തും കല്‍ക്കെട്ടുകള്‍ തെളിഞ്ഞിട്ടുണ്ട്. ഡാമിന്റെ രണ്ടറ്റത്തും കല്ലുകള്‍ ഇളകി സുഷിരങ്ങള്‍ വീണിരിക്കുകയാണ്.

ജലനിരപ്പ് താഴ്ന്നതോടെയാണ് അണക്കെട്ടില്‍ കൂടുതല്‍ വിള്ളലുകള്‍ കാണാന്‍ കഴിഞ്ഞത്. വെള്ളത്തിനടിയിലേക്ക് ഇനിയും വിള്ളലുകളുണ്ടാകുമോ എന്ന കാര്യം വ്യക്തമല്ല. എന്നാല്‍ അടിഭാഗത്തേക്കു പോകും തോറും ഡാമിന്റെ വിള്ളലുകള്‍ വലിയതും ആഴമുള്ളതുമായാണ് കാണുന്നത്.

കേരളത്തില്‍ ഈയിടെ നടന്ന ഭൂകമ്പങ്ങള്‍ അണക്കെട്ടിന് കാര്യമായ ഇളക്കം തട്ടിച്ചിട്ടുണ്ടെന്ന് വിദഗ്ധര്‍ പറയുന്നു. അടിഭാഗത്തെ സപ്പോര്‍ട്ടിംഗ് ഡാമിലേക്കുള്ള ബീമുകള്‍ക്ക് സമ്മര്‍ദ്ദം താങ്ങാനുള്ള ശേഷിയില്ലാത്തതാണ് അണക്കെട്ടിന് ഇത്രയും ഇളക്കം തട്ടാന്‍ കാരണം.

നൂറു വര്‍ഷത്തോളം പഴക്കമുള്ള മുല്ലപ്പെരിയാര്‍ അണക്കെട്ട് ഭൂചലനത്തിന് ശേഷം സുരക്ഷിതമാണന്ന് പറയാനാവില്ലെന്ന് ഹൈദരാബാദിലെ ഭൗമ ഗവേഷണ കേന്ദ്രം ഡയറക്ടര്‍ ഡോ. റസ്തോഗി പറഞ്ഞു. എന്നാല്‍ അണക്കെട്ടിന്റെ ഉയരം കൂട്ടുന്നത് അപകടമുണ്ടാക്കുമോ എന്ന കാര്യത്തില്‍ ഉത്തരം പറയേണ്ടത് കേന്ദ്ര ജല കമ്മീഷനാണെന്ന് പറഞ്ഞ് അദ്ദേഹം ഒഴിഞ്ഞുമാറി.

കേരളത്തില്‍ അടുത്തിടെയുണ്ടായ ഭൂചലനം മുല്ലപ്പെരിയാര്‍ അണക്കെട്ടില്‍ വിള്ളല്‍ വീണെന്ന കേരളത്തിന്റെ വാദം ശരിയല്ലെന്ന് തമിഴ്നാട് പൊതുമരാമത്ത് മന്ത്രി പി. ദുരൈ മുരുകന്‍ പറഞ്ഞു. കേരളം ഭൂചലനത്തെ ഉപയോഗപ്പെടുത്തുകയാണെന്നും അദ്ദേഹം ആരോപിച്ചു.