വിഷമദ്യം: അനില്‍കുമാര്‍ പിടിയില്‍

കൊല്ലം: കല്ലുവാതുക്കല്‍, പള്ളിക്കല്‍ മദ്യദുരന്തത്തിന് കാരണമായ സ്പിരിറ്റ് എത്തിച്ചതായി സംശയിക്കപ്പെടുന്ന അനി(31) എന്ന അനില്‍കുമാറിനെ പ്രത്യേക അന്വേഷണസംഘം അറസ്റ് ചെയ്തു.

ഡിസംബര്‍ 20 ബുധനാഴ്ച പുലര്‍ച്ചെ രണ്ട് മണിക്ക് കോയമ്പത്തൂര്‍ ബസ് സ്റാന്‍ഡിന് സമീപമാണ് അനി പിടിയിലായത്. കര്‍ണാടകത്തില്‍ നിന്നും കൊച്ചനിക്കും മറ്റും വിഷസ്പിരിറ്റ് എത്തിച്ചത് കായംകുളം സ്വദേശിയായ അനിയാണെന്ന് പൊലീസ് അറിയിച്ചു.

അനിയുടെ അറസ്റ് അന്വേഷണത്തില്‍ നിര്‍ണായകമായ വഴിത്തിരിവാകുമെന്ന് കരുതപ്പെടുന്നു. മദ്യദുരന്തത്തിന് കാരണമായത് കായംകുളത്തുകാരന്‍ എത്തിച്ച സ്പിരിറ്റാണെന്ന് മണിച്ചന്‍ സൂചിപ്പിച്ചിരുന്നു. എന്നാല്‍ അന്വേഷണം മനഃപൂര്‍വം കായംകുളത്തേക്ക് നീട്ടുന്നില്ലെന്നും ആക്ഷേപമുയര്‍ന്നിരുന്നു.

അനില്‍കുമാര്‍ തന്റെ ഫിയറ്റ് കാറില്‍ പ്രത്യേകം തയാറാക്കിയ അറയിലാണ് സ്പിരിറ്റ് കൊണ്ടുവന്നിരുന്നതെന്ന് പൊലീസ് അറിയിച്ചു. എന്നാല്‍ ഹയറുന്നിസയ്ക്ക് അനി നേരിട്ട് സ്പിരിറ്റ് നല്‍കിയിരുന്നില്ല.

കായംകുളം പുതുപ്പള്ളി ദേവികുളങ്ങര പടിഞ്ഞാറെക്കരയില്‍ പുലരിചന്ത കോട്ടാല്‍തറയില്‍ കുഞ്ഞുപിള്ളയുടെ മകനായ അനി വര്‍ഷങ്ങളായി കര്‍ണാടകയിലാണ് താമസമെന്ന് പൊലീസ് പറഞ്ഞു. ആറ് വര്‍ഷമായി സ്പിരിറ്റ് കടത്തുന്ന ഇയാള്‍ ദുരന്തമുണ്ടായ ഉടന്‍ മുങ്ങുകയായിരുന്നു. ദുരന്തത്തിന് ശേഷം കൊച്ചനിയുമായി ഇയാള്‍ ഫോണില്‍ ബന്ധപ്പെടാറുണ്ടായിരുന്നെന്നും പൊലീസ് അറിയിച്ചു.