വേമ്പനാടിന്റെ തീരത്ത് വാട്ടര്‍ സ്കേപ്സ്

കുമരകം: വേമ്പനാട് കായലിന്റെ തീരത്ത് ഭൂമിയില്‍ നിന്നും പൊട്ടിമുളച്ചതുപോലെയുള്ള കുടിലുകള്‍ സഞ്ചാരികളെ കാത്തിരിക്കുന്നു. കെടിഡിസി തയാറാക്കിയ വാട്ടര്‍ സ്കേപ്സ് കായലോര റിസോര്‍ട്ടിന്റെ പണി പൂര്‍ത്തിയായിക്കഴിഞ്ഞു.

രണ്ട് മീറ്റര്‍ ഉയരമുള്ള പൊയ്ക്കാലുകളില്‍ കെട്ടിമേഞ്ഞ കുടിലുകളാണ് വാട്ടര്‍ സ്കേപ്സിലുള്ളത്. വേമ്പനാട്ട് കായലിന്റെ സൗന്ദര്യം മുഴുവന്‍ വിനോദസഞ്ചാരിക്ക് ആസ്വദിക്കാന്‍ തക്കവണ്ണമാണ് ഈ ഓലമേഞ്ഞ കബാനകള്‍ തയാറാക്കിയിരിക്കുന്നത്.

കായലിന്റെ പടിഞ്ഞാറ് ഭാഗത്തെ പച്ചപ്പാര്‍ന്ന തുരുത്തില്‍ 30 കബാനകളാണ് ഒരുക്കിയിട്ടുള്ളത്. കനാലിന് കുറുകെ 10 കബാനകളും തയാറാക്കിയിരിക്കുന്നു. ചെറുവഞ്ചികളില്‍ കയറി കബാനകളിലേക്കുള്ള യാത്ര തന്നെ അവിസ്മരണീയമായ അനുഭവമാക്കുകയാണ് ടൂറിസം വകുപ്പിന്റെ ലക്ഷ്യം.

പൊയ്ക്കാലുകളില്‍ ഉയര്‍ത്തിനിര്‍ത്തിയ റസ്റാറന്റും ദക്ഷിണേന്ത്യയിലെ ഏറ്റവും വലുതെന്ന് കരുതപ്പെടുന്ന നീന്തല്‍ക്കുളവും വാട്ടര്‍ സ്കേപ്സിന്റെ പ്രത്യേകതകളാണ്. ഇവിടെ കുട്ടികള്‍ക്കായി പ്രത്യേകം തയാറാക്കിയ നീന്തല്‍ക്കുളത്തില്‍ ജലവിനോദങ്ങളും താമസിയാതെ സജ്ജമാക്കും.

ആയുര്‍വേദകേന്ദ്രം, ആംഫിതിയേറ്റര്‍, ബാര്‍, എയര്‍ കണ്ടീഷന്‍ഡ് കോണ്‍ഫറന്‍സ് ഹാള്‍ തുടങ്ങിയവയും ഇവിടെ സജ്ജീകരിച്ചിരിക്കുന്നു. സമീപ വിനോദസഞ്ചാര കേന്ദ്രങ്ങളായ തേക്കടി, പെരിയാര്‍ വന്യജീവിസങ്കേതം, കൊച്ചി എന്നിവിടങ്ങളിലേക്ക് വാട്ടര്‍ സ്കേപ്സില്‍ നിന്നും യാത്രാസൗകര്യവും ഒരുക്കിയിരിക്കുന്നു.