ചെങ്കോട്ടയില്‍ അതിക്രമിച്ചു കടന്ന ഒരാള്‍ കൊല്ലപ്പെട്ടു

ദില്ലി: ഡിസംബര്‍ 22 വെള്ളിയാഴ്ച ചെങ്കോട്ടയില്‍ അതിക്രമിച്ചു കടന്നവരില്‍ ഒരാളെന്നു കരുതപ്പെടുന്ന ലക്ഷ്കാര്‍ -ഇ - തൊയിബ പ്രവര്‍ത്തകന്‍ ഏറ്റുമുട്ടലില്‍ കൊല്ലപ്പെട്ടു. ഡിസംബര്‍ 26 ചൊവാഴ്ച അതിരാവിലെ പൊലീസുമായുണ്ടായ ഏറ്റുമുട്ടലില്‍ ഇയാള്‍ കൊല്ലപ്പെടുകയായിരുന്നുവെന്ന് ദില്ലി പൊലീസ് അറിയിച്ചു.

ദില്ലിയിലെ ഒഖ്ലയ്ക്കടുത്ത് ബാത്ലയിലിലെ ഒരു ഫ്ലാറ്റിലായിരുന്നു ഭീകരന്‍ താമസിച്ചിരുന്നത്. ദില്ലി പൊലീസ് സ്പെഷ്യല്‍ സെല്‍ അംഗങ്ങള്‍ ചൊവാഴ്ച പുലര്‍ച്ചേ ഈ ഫ്ലാറ്റ് റെയ്ഡ് ചെയ്യാനെത്തിയപ്പോള്‍ ഭീകരന്‍ വെടിയുതിര്‍ത്തു. പൊലീസിന്റെ തിരിച്ചുള്ള വെടിവയ്പില്‍ ഇയാള്‍ കൊല്ലപ്പെടുകയായിരുന്നുവെന്ന് സ്പെഷ്യല്‍ ബ്രാഞ്ച് എ സി പി രാജ്ബീര്‍ സിംഹ് അറിയിച്ചു.

ഒരു എ കെ 56 തോക്കും രണ്ടു കൈഗ്രനേഡുകളും രണ്ടു മാസികകളും ഫ്ലാറ്റില്‍ നിന്നു കണ്ടെടുത്തു. ഫ്ലാറ്റില്‍ കൊല്ലപ്പെട്ട ഭീകരന്‍ മാത്രമേ ഉണ്ടായിരുന്നുള്ളൂ.