എന്‍എസ് എസ് നയത്തെ പിന്തുണയ്ക്കുന്നവരെ സഹായിക്കും

ചങ്ങനാശ്ശേരി: എന്‍എസ്എസിന്റെ നയങ്ങളെ പിന്തുണയ്ക്കുന്ന രാഷ്ട്രീയകക്ഷികള്‍ ഏതായാലും സഹായിക്കുമെന്ന് എന്‍എസ്എസ് ജനറല്‍ സെക്രട്ടറി പി.കെ.നാരായണപണിക്കര്‍.

പെരുന്നയില്‍ നടന്ന മന്നം ജയന്തി ആഘോഷങ്ങള്‍ക്ക് ശേഷം ജനവരി രണ്ട് ചൊവാഴ്ച വാര്‍ത്താലേഖകരോട് സംസാരിക്കുകയായിരുന്നു പണിക്കര്‍. എന്‍എസിന്റെ നിലപാടുകളെ സഹായിക്കുന്നവര്‍ക്ക് എന്‍എസ്എസ് പിന്തുണ നല്‍കും. ഇടതുമുന്നണി സര്‍ക്കാരിന്റെ വിദ്യാഭ്യാസ, മദ്യ, സംവരണനയത്തോട് എന്‍എസ്എസിന് വിയോജിപ്പാണുള്ളതെന്ന് നാരായണപ്പണിക്കര്‍ വ്യക്തമാക്കി.

സംവരണകാര്യത്തില്‍ ഒരു രാഷ്ട്രീയകക്ഷിയും എന്‍എസ്എസിനെ സഹായിച്ചിട്ടില്ല. നരേന്ദ്രന്‍ കമ്മീഷന്റെ നിയമനത്തിന് നിയമസാധുതയില്ലാത്തതിനാല്‍ റിപ്പോര്‍ട്ട് നടപ്പാക്കരുതെന്ന് പണിക്കര്‍ ആവശ്യപ്പെട്ടു.

ജനവരി രണ്ട് ചൊവാഴ്ച പെരുന്നയില്‍ ഉത്രാടം തിരുനാള്‍ മാര്‍ത്താണ്ഡ വര്‍മ്മ മന്നം മ്യൂസിയം ഉദ്ഘാടനം ചെയ്തു. ജയന്തി സമാപന സമ്മേളനത്തില്‍ എംപിമാരായ രമേശ് ചെന്നിത്തല, സുരേഷ്കുറുപ്പ് തുടങ്ങിയവര്‍ പങ്കെടുത്തു.