പണിമുടക്ക് ഭാഗികം

തിരുവനന്തപുരം: സെക്രട്ടറിയേറ്റില്‍ ജീവനക്കാരെ മര്‍ദ്ദിച്ചതില്‍ പ്രതിഷേധിച്ച് യുഡിഎഫ് അനുകൂല സംഘടനകളില്‍ പെട്ട ജീവനക്കാര്‍ നടത്തിയ പണിമുടക്ക് ഭാഗികം.

ജനവരി 11 വ്യാഴാഴ്ച ഉച്ചവരെയുള്ള റിപ്പോര്‍ട്ട് അനുസരിച്ച് പണിമുടക്ക് പൊതുവേ സമാധാനപരമായിരുന്നു. വടക്കന്‍ ജില്ലകളില്‍ പണിമുടക്ക് കാര്യമായ പ്രതികരണമുണ്ടാക്കിയില്ല. കാഞ്ഞങ്ങാട് സര്‍ക്കാര്‍ സ്കൂളില്‍ അധ്യാപകര്‍ക്കായി നടത്തിയ എന്യുമറേഷന്‍ ക്ലാസുകള്‍ പണിമുടക്ക് അനുകൂലികള്‍ തടഞ്ഞതിനെ തുടര്‍ന്ന് നിര്‍ത്തിവയ്ക്കേണ്ടി വന്നു.

പണിമുടക്കിയ ജീവനക്കാര്‍ തിരുവനന്തപുരത്ത് സെക്രട്ടറിയേറ്റ് മാര്‍ച്ച് നടത്തി. എറണാകുളത്തും ജീവനക്കാര്‍ പ്രകടനം നടത്തി. സെക്രട്ടറിയേറ്റില്‍ ജീവനക്കാര്‍ക്ക് നേരെയുണ്ടായ ആക്രമണത്തെ കുറിച്ച് ജുഡീഷ്യല്‍ അന്വേഷണം നടത്തണമെന്ന് സെറ്റോ ചെയര്‍മാന്‍ മങ്ങാട് രാജേന്ദ്രന്‍ ആവശ്യപ്പെട്ടു. മുഖ്യമന്ത്രിയുടെ അറിവോടെയാണ് മര്‍ദ്ദനം നടന്നിരിക്കുന്നതെന്നും രാജേന്ദ്രന്‍ ആരോപിച്ചു.