മണിച്ചനെതിരെ കൊലക്കുറ്റത്തിന് കേസെടുത്തേക്കും

തിരുവനന്തപുരം: കല്ലുവാതുക്കല്‍ വിഷമദ്യദുരന്തക്കേസിലെ മുഖ്യപ്രതികളായ മണിച്ചനും കൊച്ചനിക്കുമെതിരെ കൊലക്കുറ്റത്തിന് കേസെടുത്തേക്കുമെന്ന് പ്രത്യേക അന്വേഷണസംഘം വൃത്തങ്ങള്‍ സൂചിപ്പിച്ചു.

വിഷമാണെന്ന് അറിഞ്ഞുകൊണ്ട് മീതൈല്‍ ആള്‍ക്കഹോള്‍ വിതരണം ചെയ്യുകയും അത് 35 പേരുടെ മരണത്തിനിടയാക്കുകയും ചെയ്തതു കൊണ്ടാണ് മണിച്ചനും കൊച്ചനിക്കുമെതിരെ കൊലക്കുറ്റത്തിന് കേസെടുക്കുന്നത്.

ഹൊസൂറില്‍ നിന്നും മണിച്ചനും കൊച്ചനിക്കും സ്പിരിറ്റ് നല്‍കിയ അനില്‍കുമാര്‍ മീതൈല്‍ ആള്‍ക്കഹോള്‍ കോളയില്‍ കലര്‍ത്തി കുടിച്ചുനോക്കിയ ശേഷമാണ് ഇവര്‍ക്ക് നല്‍കിയത്. എന്നാല്‍ ഇതിന്റെ അളവ് കുറവായിരുന്നതിനാല്‍ ദോഷമുണ്ടായില്ല. മണിച്ചനും കൊച്ചനിയും കഴിഞ്ഞാല്‍ പ്രധാന പ്രതി അനില്‍കുമാറായിരിക്കുമെന്ന് അന്വേഷണസംഘം സൂചിപ്പിക്കുന്നതായി മാതൃഭൂമി ദിനപത്രം റിപ്പോര്‍ട്ട് ചെയ്യുന്നു.

കേസിലെ മറ്റ് പ്രതികളും തുല്യ പങ്കാളികളാണെങ്കിലും ആളുകളെ കൊല്ലാന്‍ അവര്‍ക്ക് ഉദ്ദേശമില്ലാതിരുന്നതിനാല്‍ അവര്‍ക്കെതിരെ കൊലക്കുറ്റത്തിന് കേസെടുക്കാന്‍ സാധ്യതയില്ലെന്നും റിപ്പോര്‍ട്ടില്‍ പറയുന്നു.