37 ലക്ഷം കുടുംബങ്ങള്‍ക്ക് റേഷന്‍ പഞ്ചസാരയില്ല

തിരുവനന്തപുരം: ഏപ്രില്‍ ഒന്ന് ഞായറാഴ്ച മുതല്‍ കേരളത്തിലെ 37 ലക്ഷത്തോളം കുടുംബങ്ങള്‍ക്ക് റേഷന്‍ പഞ്ചസാര കിട്ടാതാകും. ദാരിദ്യ്ര രേഖയ്ക്കു താഴെയുള്ളവര്‍ക്കു മാത്രമായി റേഷന്‍ പഞ്ചസാര പരിമിതപ്പെടുത്താനുള്ള കേന്ദ്ര സര്‍ക്കാര്‍ തീരുമാനത്തെ തുടര്‍ന്നാണിത്.

ദാരിദ്യ്ര രേഖയുടെ വേര്‍തിരിവില്ലാതെ 57 ലക്ഷത്തോളം കുടുംബങ്ങള്‍ക്കാണ് സംസ്ഥാനത്ത് ഇപ്പോള്‍ റേഷന്‍ പഞ്ചസാര ലഭിക്കുന്നത്. റേഷന്‍ കാര്‍ഡുള്ള 62 ലക്ഷം കുടുംബങ്ങളില്‍ ആദായ നികുതി ദായകര്‍ ഉള്‍പ്പെടുന്ന അഞ്ചു ലക്ഷത്തോളം കുടുംബങ്ങളെ റേഷന്‍ പഞ്ചസാര വിതരണത്തില്‍ നിന്ന് കഴിഞ്ഞ വര്‍ഷം ജൂലായില്‍ തന്നെ ഒഴിവാക്കിയിരുന്നു.

ദാരിദ്യ്ര രേഖയ്ക്കു താഴെയുള്ളവര്‍ക്കു മാത്രമായി റേഷന്‍ പഞ്ചസാര ചുരുക്കിയതോടെ കേന്ദ്രത്തില്‍ നിന്ന് കേരളത്തിന് ലഭിക്കുന്ന പ്രതിമാസ പഞ്ചസാര വിഹിതമായ 12,375.4 മെട്രിക് ടണ്ണില്‍ ഗണ്യമായ കുറവുണ്ടാകും. ഇത് പൊതു വിപണിയില്‍ പഞ്ചസാരയുടെ വില വര്‍ധിക്കുന്നതിന് കാരണമാകും. ലെവി പഞ്ചസാരയുടെ അളവ് കുറച്ചതുവഴി പഞ്ചസാര വില്പനയിലുള്ള സര്‍ക്കാര്‍ നിയന്ത്രണവും നഷ്ടമാകും.

പഞ്ചസാര വിതരണം പരിമിതപ്പെടുത്തുന്നതോടെ റേഷന്‍ കടകളുടെ നിലനില്പും പ്രതിസന്ധിയിലാകും. അരിവില വര്‍ധിച്ചതോടെ ജനങ്ങളില്‍ ഭൂരിഭാഗവും പഞ്ചസാരയ്ക്കു മാത്രമാണ് റേഷന്‍ കടകളെ ആശ്രയിക്കുന്നത്.