പറശ്ശിനിക്കടവ്: ആനന്ദന്റെ പ്രസ്താവന വിവാദമാകുന്നു

കണ്ണൂര്‍: പറശ്ശിനിക്കടവ് പാമ്പുവളര്‍ത്തല്‍ കേന്ദ്രത്തില്‍ ഡിസംബര്‍ 10 ഞായറാഴ്ച നടന്ന സംഭവത്തില്‍ ഉദ്യോഗസ്ഥര്‍ കുറ്റക്കാരല്ലെന്നും ജന്തുക്കള്‍ മരിക്കാന്‍ കാരണം കോടതിയുടെ നടപടികളാണെന്നുമുള്ള ആനത്തലവട്ടം ആനന്ദന്‍ എംഎല്‍എയുടെ പ്രസ്താവന വിവാദമാകുന്നു.

സംഭവം അന്വേഷിച്ച നിയമസഭാ സമിതി ചെയര്‍മാന്‍ ആനന്ദന്റെ പ്രസ്താവനയ്കക്കെതിരെ യുഡിഎഫ് അംഗം കുട്ടി അഹമ്മദ് കുട്ടി എംഎല്‍എ രംഗത്തു വന്നതോടെയാണിത്.

ആനന്ദന്റെ അഭിപ്രായത്തോട് തനിക്ക് യോജിപ്പില്ലെന്നും അത് സമിതിയുടെ അഭിപ്രായമല്ലെന്നുമാണ് അഹമ്മദ് കുട്ടി പറയുന്നത്. നിയമസഭാസമിതിയുടെ തെളിവെടുപ്പു കഴിഞ്ഞ് അംഗങ്ങള്‍ കൂട്ടായാണ് തീരുമാനങ്ങള്‍ എടുക്കേണ്ടത്. എന്നാല്‍ ഇക്കാര്യത്തില്‍ അത് നടന്നിട്ടില്ല.

താന്‍ തിരഞ്ഞെടുപ്പു പ്രവര്‍ത്തനങ്ങള്‍ക്കായി സ്വദേശത്തേക്കു പോയപ്പോള്‍ ചില അംഗങ്ങള്‍ ഏകപക്ഷീയമായ രീതിയില്‍ നടത്തിയ പരസ്യമായ അഭിപ്രായപ്രകടനങ്ങള്‍ ജനാധിപത്യവിരുദ്ധമാണ് - അദ്ദേഹം ചൂണ്ടിക്കാട്ടി.