മൗലവി വധവുമായി ബന്ധമില്ല: കാന്തപുരം
കോഴിക്കോട്: ചേകന്നൂര് മൗലവിയുടെ വധവുമായി തനിക്കോ സുന്നി മര്ക്കസ് സംഘടനയ്ക്കോ ബന്ധമില്ലെന്ന് സുന്നി നേതാവ് കാന്തപുരം എ.പി.അബൂബക്കര് മുസലിയാര്.
വധവുമായി ബന്ധപ്പെട്ട് തന്നെ സിബിഐ ചോദ്യം ചെയ്തിട്ടില്ലെന്നും ജനവരി 20 ശനിയാഴ്ച വാര്ത്താസമ്മേളനത്തില് കാന്തപുരം വ്യക്തമാക്കി. സമസ്ത കേരള ജം ഇയ്യത്തുല് ഉലമയെയും സമസ്ത കേരള സുന്നി യുവജന സംഘടനയെയും താറടിച്ചുകാണിക്കാനാണ് ചേകന്നൂര് വധത്തില് ഈ സംഘടനകള് ഉള്പ്പെട്ടിട്ടുണ്ടെന്ന് പ്രചരിപ്പിക്കുന്നതെന്ന് കാന്തപുരം ആരോപിച്ചു.
കേസുമായി ബന്ധമുണ്ടെന്ന് പറയപ്പെടുന്ന ഉസ്മാന് മൗലവിയെ പരിചയമുണ്ടെങ്കിലും കുറച്ചുകാലമായി അദ്ദേഹവുമായി യാതൊരു ബന്ധവുമില്ലെന്ന് കാന്തപുരം വെളിപ്പെടുത്തി.
മൗലവി വധത്തിന് പിന്നിലുണ്ടെന്ന് സംശയിക്കപ്പെടുന്ന സുന്നി ടൈഗര് ഫോഴ്സ് എന്ന സംഘടനയെ കുറിച്ച് താന് കേള്ക്കുന്നത് വാര്ത്തകളില് നിന്ന് മാത്രമാണെന്നും കാന്തപുരം വ്യക്തമാക്കി.